'अतीत' (डॉ. चंचल भसीन)

‘अतीत’

जिसलै घर बौह्‌ने दा 
खु’ल्ला समां मिलेआ ऐ
मेरा अतीत परतोई आया ऐ
सामधाम, नजरी अग्गै आई खड़ोता ऐ

हर इक शैऽ
हांबदी,पुछदी सेही होई –
की लाया
असेंगी मिलने च
इन्ना चिर

कमरें दी इक-इक चूंह्‌क
लग्गेआ बलगा दी ऐ
जे  कोई उसगी फंडै-सोतै
लिंबी-पोची रक्खै
जे उसदा रूपै बंदोऐ

अलमारी खोह्‌लदे गै
हर इक चीज
बिंबली-बिंबली पवै 
इक-दुए- थमां अग्गै औने गी
धुस्सां मारै
इक बी नेईं रेहा अपनी थाह्‌रा
सब्भै आई पैरें- बाह्‌मैं पलमोए
अश्कैं आखन –
तुन्नो-तुन्नी च घुटन होआ दी ही

रसोई दा हाल बी किश नेहा गै हा
खिट्टें पेदी जिंदगी च
किश कढ़ाई, पतीले, कौलियां, कड़छियां
जोरें-जोरें तांह्-तोआंह् ठनकदियां
ते
किश अपनी बारी दी निहालपै च रौंह्‌दियां
खुंझा लग्गी दियां
धूड़-मधूड़ियां
बरीह्‌के ञ्याने लेखा छिंडै कीती दियां
हांईं-मांहीं नेईं ही लैंदी
उं’दी बाता-लोऽ
अज्ज बड़ियां खुश न
कम्म आइयां न
उं'दे च अज्ज पक्का दे न
बन-सबन्ने पकोआन
हत्था चिमचे बी छड़ोई गे

घरै दे जीएं दा बी किश इ'यै हाल हा
समें दी घाट ने
मिगी करी दित्ते दा हा
इं'दे थमां,
परोआर थमां दूर
अज्ज दायरा घटी गेआ ऐ
दुनिया लौह्की
पर सौखी बझोआ दी ऐ
फ्ही परतोई आई आं में अपनें च
एह् मीं दिक्खियै खुश न
ते में इ’नेंगी
मेरा अतीत परतोई आया ऐ
सामधाम, नजरी अग्गै आई खड़ोई गेआ ऐ ।
               ©️(डॉ. चंचल भसीन)