"हीखी"
ड़ियोढी च बैठी दी
निम्नोझानी
औंदे-जंदे गी दिक्खदे
सड़कै उप्पर
नज़र ताड़े दे
केईं क्रोह् पैंडा
रोज़ करी जंदी ऐ
औंदे दा मुँह ते जंदे दी पिट्ठ
बस्स इ'यै दुनिया ऐ हून।
रूकी गेदी ऐ
पैरें दी रफ़्तार
बज्झी गेदे भित्तै गी
जंदरे आंगर
ख़ाली कमरें ते
सुन्न-मसान बेह्ड़ा
खाने गी पौंदा ऐ
दलकदा ऐ
धरूकदा ऐ
लहू-लुहान करदा ऐ
पर खन्दा नेईं,
सैह्कने लेई रखदा ऐ
उंदे लेई
जेह्ड़े उड्डरी जाई बैठे न
अपने बक्खरे आह्लड़े च
पर फ्ही बी रौंह्दी ऐ
चैंता, झूरे, फ़िकर
उंदे बद्धने मठोने दी,
जि'नेंगी बलगदियां न
एह् हिरखी अक्खीं।
( डॉ. चंचल भसीन )
