अपनों को

परमात्मा की मर्जी के आगे हमेशा नतमस्तक....!!

"लहुऎ दा रंग" क्हानी संग्रैह इक जायजा- डॉ. चंचल भसीन

                                    "लहुऎ दा रंग"  क्हानी संग्रैह इक  जायजा                                                                                                                               डॉ. चंचल भसीन

               तारा दानपुरी होर डोगरी दे सोह्गे-सेआने ते बहुमुखी प्रतिभा आह्ले साहित्यकार जि'नेँ अज्जै तगर केईँ साहित्यक विधाएं गी अपनी सूझ-बूझ आह्ली पैनी का'न्नी रा'हेँ कलमबद्ध कीते दा ऎ। इंदी कृतियेँ दे विशेँ बडे निग्गर समाजै दी नुमांयदगी करने आह्ले न। चाहे इंदियेँ क्हानी दी गल्ल कीती जां भामेँ उपन्यासेँ दी, उंदे पात्तर समाजिक परिवेश चा गै लैते गेदे न जेह्ड़े अपने-अपने किरदारेँ च रूझे दे जीवनै दा निर्वाह करदे से'ई होँदे न। इ'नेँ फौज ते शिक्षा दे विभाग थमां सेवानिवृत होने दे बाद अपना सफर होर मता तेज कीता। इस च इ'नेँ अपने जीवनै दे सब्भै खट्टे-मिट्ठे अनुभव जेह्ड़े दिक्खे-भाले दे न उब्भी चित्रत कीते दे न। इ'नेँ साहित्य लेखन दी शुरुआत बशक्क क्हानी कन्नै कीती पर प्रकाशत रुपै च जेह्ड़ी कृति सभनेँ थमां पैह्ले आई ओह् उपन्यास दे तौर पर ही। इ'न्दा पैह्ला उपन्यास जीवनदान जेह्ड़ा मार्क्सवादी द्वंद्वात्मक शैली च लिखेआ गेदा ऎ।जिसदा डोगरी साहित्य च खासा थाह्‍र ऎ। इस बाद इंदा पैह्ला क्हानी संग्रैह् केईँ जनम सन् 1998 च, जिस च नौ (9) क्हानियां हियां। दूआ उपन्यास चेतना सन् 2000 च प्रकाशत होआ, जिसी रचनाकार अपनी श्रेश्ठ रचना समझदा ऎ। लेखक लोकेँ दे हितेँ ते उंदे कन्नै होने आह्ली बेन्याई दी गल्ल करदे न। इ'नेँ मूल रचनाएं दे कन्नै-कन्नै किश रचनाएं दा दूई भाशाएं थमां रूपांतर बी कीते दा ऎ जि'यां बंगला उपन्यास दा सादा लिफाफा नां कन्नै, न्यारी भगती, सैह्जे-सैह्जे पाओ ते करां जगत कोला न्यारा आदि कताबेँ दा डोगरी च रूपांतर कीते दा ऎ।

           हून क्हानीकार दे रूपै च इक बारी फ्ही साढ़े सामने आए न। अपना दूआ क्हानी संग्रैह लहुऎ दा रंग लेइयै जिस च सौह्ला ( 16 ) क्हानियां न। लेखक मताबक इस संग्रैह च संकलत क्हानियां किश मतियां परानियाँ न यानि सखेतरू गैँईँ दियां सन् 1985 थमां लेइयै 2000 तगर लिखी गेदियां क्हानियां। पर उच्च कोटि दियां न जि'यां इस संग्रैह च उब्भी क्हानी शामल ऎ जेह्ड़ी इ'नेँ सभनेँ थमां पैह्ले लिखी ही। पुल क्हानी, जिस पर टैली फिल्म बी बनी चुकी दी ऎ। इ'यां गै नौ गज्जियां बामना क्हानी दा हिँदी रूपांतर हो चुके दा ऎ। दानपुरी होर क्हानीकार दे रूपै च इस मकाम तगर पुज्जने दा श्रेय विजय वर्मा ते डॉ. ओम गोस्वामी होरेँ गी दिँदे न जिँदी प्ररेणा जां मार्गदर्शन करी एह् इत्थूं तगर पुज्जी सके न।

         इंदे इस संग्रैह च जेह्ड़ियां क्हानियां न ओह् समाजक मान-मुल्ल, कदरां जिसगी पाने आस्तै माह्नूं छडपा-तडफा दा ऎ। पर उसी ओह् आह्ली संतुश्टी नेईँ मिला दी, फ्ही बी ओह् जीवनै गी अग्गै त्रीड़े दा ऎ।

       1. मोह्-भंग:-संग्रैह दी पैह्ली क्हानी उस समाजै दी नशानदेही करदी ऎ जेह्ड़ा खिट्टां पेदा तरक्की आह्ली भेट्ठा बद्धा जा दा ऎ उसी मनुक्खी कदरेँ दी परवाह नेईँ ऎ। पैहे दी भुक्ख इन्नी बद्धी गेदी ऎ उसी मनुक्खी जानेँ दी बी कोई फिकर नेईँ ऎ। इ'यां इस क्हानी च सोमू जिस दा ञ्यांना हस्पताल च दाखल करांदा ऎ। दवाई लैन गेदे ओह्दी मलाटी ग्राँऽ दे दोस्त कन्नै होँदी ऎ जिन्नै शैह्‍र आनियै अपनी इक चंगी पंछान बनाई लेदी ऎ ते सोमू दी माली हालत दिक्खियै उसी बी उत्थै गै किश कम्मकाज करी लैने आस्तै आखदा ऎ ते समझदा ऎ,"एह् लोकतंत्र ऎ भाई इत्थै जनता आस्तै सिर्फ अधिकार बनाए जंदे न दित्ते नेईं जंदे। अधिकार प्राप्त करने तांई अपने गै हत्थ-पैर चलाने पौँदे न। अधिकारेँ दी लुट्ट ऎ पेई दी।जिन्ना कोई लुट्टी लै ओह्दी हिम्मत ऎ। इस करी आक्खना तुम्मी शैह्‍र टुरी आ तुगी बी लुट्टने दे दाऽ आई जाङन, वरना एह् सरकार तेरा हत्थ पकडियै, तुगी ठुआलने आस्तै ग्रां नेईँ लगी जान।" (सफा - 20 ) सोमू अजेँ जक्को-तक्के च गै फसे दा हा जे जिस हस्पतालै च ञ्यांने दा इलाज चला दा हा ओह् इमारत डिग्गी पौँदी ऎ ओह्दी त्रीमत ते जागत थल्लै गै दबोई जंदे न।पर हस्पतालै दे डिग्गी पौंने करी लोकेँ दे पैहे पिच्छै नट्ठने ते मनुक्खेँ दी कदर नेईँ करने दे दुक्खै कन्नै अपने ग्रां परतोई औँदा ऎ।

      2. नक्क कटे लोक:-भ्रश्टाचार ते रिश्वतखोरी पर अधारत क्हानी ऎ जे अज्ज अस सब्भै इस समस्या कन्नै लड़ा दे आं कीजे इस ने असेँगी अंदरो-अंदरी भुग्गा करी ओड़ेदा दे।ईमानदार लोकेँ आस्तै इक नासूर बनी चुके दा ऎ। इस दमघोटू म्हौल च अपने-आप गी पूरी चाल्ली कन्नै कटोए दा मसूस करदे न। बशक्क इस कबैह्तै गी रोकने आस्तै जि'न्ना मर्जी बरोध करन जां रिश्वत लैने आह्ले गी समझान पर इस च कामयाव नेईँ होई सकदे।सगुआं इस दी मुखालफत करने आह्ले दी गै सूली पर चढाई दित्ता जंदा ऎ।जिंदगी भर रगडे खंदे रौँह्दे न।उ'नेँगी अपनी नौकरी ते घर परिवार दी पालमा करना मुश्कल होई जंदा ऎ। इ'यां गै इस क्हानी च जि'नेँगी अपने नक्कै दी इज्जतू दी कोई परवाह नेईँ ऎ ओह् ऎसे नक्क कटे न जि'नेँगी तन्खाही कन्नै किश नेईँ बनदा ते पैहे पिच्छै इन्ने अन्ने न जे दौनेँ-दौनेँ हत्थेँ लोकेँ गी त्रुक्कै दे न।क्हानी च बाबू राम सरन अपने दफ्तरै च बद्‍धी रिश्वतखोरी थमां बडा गै परेशान ऎ इसी रोकने दे बडे जतन करदा ऎ पर इसगी रोकी पाना ओह्दे आस्तै इ'न्ना आसान नेईँ ऎ कीजे दफ्तरै दे बड्डे अफसर बी रिश्वत दे हिमायती न।ओह् बाबू राम सरन होरेँगी बी इयै समझांदे न, "ठीक ऎ अगर तुस रिश्वत नेईँ लैना चांह्दे ते तुस नेईँ लैओ मेँ तुसेँ-ई कम्पैल नेईँ करदा। पर तुसेँ साढे कन्नै कोओप्रेटिव ते रौह्ना चाहिदा ऎ।" (सफा -25 ) उंदे कम्मै च पूरा सहैजोग करन इ'यां कम्मै च आडिग नेईँ बनन। पर जिसलै उंदी मर्जी मताबक नेईँ चलदा तां बाबू राम सरन दे खलाफ फौजदारी ते अनुशासनहीनता दा केस बनाइयै फसाई ओडदे न।बशक्क त्र'ऊं ब'रेँ मगरा बाह्ल होई जंदा ऎ पर इस दौरान उसी ते ओह्दे परिवारै दी पालमा अद्धी तन्खाही कन्नै उब्भी त्र'ऊं-च'ऊं म्हीनेँ मगरा मिलदी ही। घरै दा गुजारा मुश्कल होई जंदा ऎ।जिस दिन बापस दफ्तर औँदा ऎ तां दिक्खदा जे ओह् लोक ते पैह्ले थमां बी ज्यादा खुल्ले होई गेदे न उ'नेँ सगुआं कम्मेँ दे रेट रक्खी लेदे न एह् सब्भ किश दिक्खियै ओह् चिँतत रौँह्दा ऎ।जे सब्भ लोक किस बक्खी जा करदे न ते ओह्दी घरैआह्ली इयै समझांदी ऎ जे उब्भी उंदे गै रंग च रंगोई जा जेकर जिँदगी जीनी ऎ ते नक्क कटाने गै पौना ऎ कीजे जिँदगी च हर कोई नक्क कटांदा ऎ।

        3. हरे जंगल दा कत्ल:-क्हानीकार लगातार बडोँदे जंगल-जाड ते इस कारण होँदे पर्यावरण गी खतरे करी फिकरमंद लभदे न। कीजे इसदा असर पूरी कायनात पर पवै दा ऎ। करसान अम्बरै आह्ली बक्खी ताडी लाइयै बैठे दा ऎ जिसलै फसल राह्ने दी बारी औँदी ऎ तां पानी दी लोड ऎ ओह् मिलदा नेईँ ऎ बेमौके ब'रियै तबाई पुट्टी जंदा ऎ। सारा पर्यावरण गै हिली गेदा ऎ। अज्ज शैह्‍रीकरण होने करी जंगलेँ दे जंगल तवाऽ करी दित्ते गे न जेकर सरकार बी कोई पंजबरी योजना बनांदी ऎ तां बी कोई हल नेईँ निकलियै नेईँ औँदा ऎ। इस बक्खी ध्यान देने दी लोड ऎ जे प्राकृतक संतुलन ठीक रखेआ जा।मते बूह्टे लाए जान।

         4. बे बलगै दी होग:-मां-बब्ब अपनी औलदे दी पालमा बडी चाएं-चाएं ते अपनी बुढापे दा स्हारा मिथियै करदे न पर एह् गल्ल बी नेईं जे ओह् स्वार्थ रक्खियै उंदी पालमा करदे न पर जिसलै ञ्यांने व्योही-बरी कम्मै-काजै लगी, कुसै मकामै तगर पुज्जी जंदे न तां ओह् अपना चुल्ल-चौक्का बक्ख करी लैँदे न, उ'नेँगी अपने माऊ-बब्ब कन्नै कोई लगाऽ नेईँ रौंह्दा ऎ। बे बलगै दी होग क्हानी च बदनसीब बजुर्ग जेह्डे बढेपे बेलै ठेडे खाने पर मजबूर न उंदे दो जागत, इक पढी-लिखियै तसीलदार शैह्‍र लग्गी जंदा ऎ।अपने हिस्से दी ग्रां च जिमीँ-जायदाद दा हिस्सा बी बेची दिँदा ऎ ते शैह्‍र चली जंदा ऎ ते उसी माऊ-बब्बै दी बी फिकर नेईँ ऎ पर जेह्डा निक्का ग्रां च रौँह्दा ऎ ओह्दा कोई इ'न्ना करोबार बी नेईँ ऎ पर फ्ही बी उंदी सेवा सरबन पुत्तर आह्ला लेखा करदा ऎ जिन्ना बी अपने थमां होई सकदा ऎ। इत्थूं तगर जे ओह्दी घरैआह्ली बी खिँझदी ऎ जे सारी टंडोआह्ली उ'नेँदी गै करनी पौँदी ऎ। देसू फ्ही बी टैल सेवा च कोई कसर नेईँ रखदा।रातीँ'लै उट्ठी-उट्ठी उ'नेँगी दिखदा ऎ। लाईलाज बीमारी करी बब्बै दा काल होई जाने पर बड्डा भ्रा इ'यां पेखन आनियै करदा ऎ जि'यां उसगी बडा दुक्ख ऎ। बड्डा होने दे नाते सारे संस्कार रस्मां उ'यै करदा ऎ ते लोकेँ च बडा चंगा बनी जंदा ऎ सब्भै रिश्तेदार इ'यै सोचदे न जे सब्भै किश बड्डा गै करा दा ऎ।बशक्क अद्‍धे पैहे देसू दे बी लग्गै दे न पर ओह् गरीबडा गै ऎ। जिसलै सारी रसमां पूरी होई जंदियां न ते देसू सोचदा ऎ खबरै हून भाई शैद बे गी अपने कन्नै लेई जाग ते शैह्‍र जाइयै ओह्दा इलाज कराग पर ओह् चुप-चपीता शैह्‍र जंदा ऎ। देसू सोचदा य

रौँह्दा जे लोक खबरै की अपने इन्ने रुप दस्सदे न। ओह्दे मनै च बार-बार इक सुआल औँदा ऎ, फ्ही एह् रौह्न-पिट्टन कनेहा-एह् खेखन की हे। (सफा-43) उसी अपनी बे पर तरस आई जंदा ऎ-बेचारी बे?

        5.पुल-उस परिवारै दी क्हानी जेह्डा बेकसूर होंदे होई आंतकबाद दी बली चढी जंदा ऎ।एह् परिवार पैह्ले खुशी-खुशी मेह्नत करियै अपने बाल-बच्चे दी पालमा ते उंदे खुशहाल भविक्ख बारै बडा गै जाग्रत सेई होँदा ऎ पर उंदे बुने दे सुखने उसलै त्रुट्टी जंदे न जिसलै घरै दा कमाऊ सदस्य आंतकवादियेँ आसेआ चलाई गेदी गोलियेँ च घालऽ होई जंदा ऎ। घालऽ केह् होँदा ऎ बल्के गोलियां पूरी लत्तै गी त्रुप्पी ओडदियां न। जख्म ठीक नेईँ होने कारण लत्त सडना शुरू होई जंदी ऎ जिस कारण लत्तै गी कप्पना पेई जंदा ऎ। ओह् ओह्दे आस्तै इक नासूर बनियै कैँसर दा रूप धारण करी लैँदा ऎ। घरै आस्तै दिक्खे दे सुक्खने रेशे-रेशे होई जंदे न।जेह्डे अपने मुडे गी इंजिनियर बनाने दे होँदे न। उंदी हालत अर्श थमां फर्श उप्पर आने आह्ली बक्खी दिक्खना पौँदा ऎ। जिसलै संजू दा डैडी ठीक हा तां ञ्यांने गी प्राइवेट स्कूलै च पढदा हा पर हून सरकारी स्कूलै च बी पढाने दी थबीक नेईँ रेई। कुडी गी पढाई गै छोडना पेई जंदी ऎ। सब्भ किश ठीक करने आस्तै लाई ओडदे न पर ओह् फ्ही बी बची नेईँ सकदा। संजू इयै सोचदा ऎ जे मास्टर होर ते इयै आक्खदे न जे सब्भै धर्म असेँगी इ'यै सिक्खमत दिँदे न जे इकमिक होइयै रौह्ना ते फ्ही एह् किस लेई ऎ। एह् सब्भ सोचियै ओह् उस चेतेँ च भुल्ली जंदा ऎ जित्थै ओह्दे डैडी ने उसी इंजिनियर बनाने आस्तै सोचे दा हा जेह्डा पुल बनांदे न पर ओह् सोचदा ऎ जे इसलै जरूरी ऎ जे इ'नेँ धर्मेँ च बनी दी खाई उप्पर इक पुल आह्ला लेखा कम्म करियै जोडने दी कोशिश कीति जा।

        6. नौ गज्जिया बामना:-एह् क्हानी दा नां पढदे गै लगदा ऎ नौ गज्जिया ते बामना कि'यां होई सकदा ऎ? जि'यां इस गी पढन लग्गो तां समझ आई जंदा ऎ जे सिर्फ कद्दै कन्नै कोई बड्डा नेईँ होई सकदा। बल्के किश करियै दसदे अर्थात कर्मे कन्नै गै इंसान बड्डा बनदा ऎ। इ'यां गै किशन इस क्हानी दा पात्तय कद्द बुत्त निक्का होने करी ग्रां दे सब्भै उसी बामना-बामना करियै कुआलदे न। इसदी कद्द-काट्ठी निक्की होने दा कारण इब्बी होई सकदा जे ओह् जतीम ञ्यांना ऎ जेह्डा अपने चाचे दे टुकडेँ पर पलदा ऎ। ते उंदे ते ग्रां दे डंगर चारियै, लोकेँ दे घरै च कम्म करियै जित्थै रूट्टी दा टुकडा मिली जा गुजारा करी लैँदा ऎ। कोई उस कन्नै हिरख नेईँ करदा सगुआं टबौके गै लांदे न। ग्रां दी इक बुड्ढी बेबू गै जेह्डी उसी हिरख करदी ऎ कीजे ओह्दा बी कोई नेईँ ऎ ते दोए इक-दूए दे दुक्खेँ दे भाली न। ओह् रोज रातीँ इक दुद्धै दा गलास पीने आस्तै दिँदी ऎ। सन् 1971 दी लडाई च सब्भै नट्ठियै कुतै अरामै आह्ली थाह्‍र चली जंदे न पर उ'नेँगी कोई बी अपने कन्नै लेइयै नेईँ जंदा। बेबू उसी बी कुतै चली जाने दी सलाह् दिंदी ऎ पर बामने च इ'न्नी हमदर्दी ऎ जे ओह् उसी छोडियै नेईँ जंदा। जिसलै फौजी उ'नेँगी बी जाने आस्तै आक्खदे न ते बेबू गी फौजी गड्डी च ब्हालियै भेजी दिँदा ऎ। पर उसदा मन हून चाचे आह्ली दुनिया अर्थात मतलबी दुनिया थमां चढी गेदा हा ओह् मौत चाहंदा हा आत्महत्या नेईँ ओह् मौत जिसी लोक बाद च बी याद रखन। ओह् फौजियें कन्नै रली जंदा ऎ कीजे डंगर चरांह्दे होई चप्पे-चप्पे दा बाकफ हा ते छुत कीते दा दुश्मन दा पता लाई आनदा। इ'यां फौजियेँ दी मदाद करदा। ते 26 जनवरी पर शौर्यचक्र दित्ता जंदा ऎ। निक्के कद्दे करी बड्डी ब्हादुरी करी दसने दी सराह्ना जिस करी ओह्दा कद्द सब्भने थमां बड्डा होई जंदा ऎ।

        7. उस दिन:-अमीर आदमी दा स्तर जिसलै घटदा ऎ ते ओह् गरीब बनदा ऎ पर जिसलै गरीबै दा स्तर घटदा ऎ ते ओह् भिक्ख मंगा बनी जंदा ऎ। क्हानी दियां एह् पंक्तियां इंसानै गी सोचने पर मजबूर करी दिँदियां न जे गरीबी कारण माह्नू किन्ना बेबस लाचार होई जंदा ऎ। तारा दानपुरी होँदी इस क्हानी च गरीब परिवार दी व्यथा गै बखान कीती दी ऎ।इस घरै दा कमाने आह्ला जिसलै बमारी कारण मंझी पर पेई जंदा ऎ तां सब्भै अपना लड छडकाने दी कोशिश करदे न। उ'नेँगी कोई बी दुआर बी नेईँ दिँदा तां सभनेँ गी चब्भन लगी पौँदे न जे इ'नेँगी दुआर दित्ता तां लैना कोह्दे कोला ऎ। प्रकाश जेह्डा फेरी लाइयै घरै दा गजारा टोरदा उसी इस गल्लै दी कोई चैँता नेईँ जे कल आस्तै बी किश जोडना ऎ कीजे ओह्दी औँदन गै इस थमां बद्ध नेईँ जे ओह् जोडी सकै। मंझी पर पौँदे गै घरै दी हालत ऎसी होई जंदी ऎ जे ञ्यांनें लूसडियां लैन लगी पौँदे न, उ'नेँगी कोई टोह् नेईँ टुकदा। जिसकरी ञ्यांनें गी भुक्खै कन्नै बिलखदे दिक्खी होल पौँदे न पर करी किश नेईँ सकदे। इत्थै तगर सोचदे न जे उ'नेँगी कोई भिक्ख बी नेईँ दिँदा।

       8. दरेडेँ दी पीड:-दरेड जेह्डी इक चीजै गी दूई चीजै थमां बक्ख करी दिँदी ऎ भामेँ ओह् रिश्तेँ दी होवै जां कुसै दीवार दी। जित्थै रिश्तेँ दी गल्ल ऎ उब्भी आपूं-चेँ जेकर जुडे दे रौह्न ते सुक्ख दिँदे न पर जेकर इंदे च दरेड पेई जा तां कालजा रूक्कदे रौँह्दे न। इ'नेँगी बेल्लै रौँहदे गै साम्भी लैना चाहिदा ऎ। क्हानीकार दे शब्देँ च," भारत भूमि बी केईँ बारी तिडकी ऎ, पर दरेड नेईँ पेई।दरेड पौने गी होई जे उसलै गै मानसून दी बरखा ब'रन लगी पौँदी जे ।दरेड पौने'शा बचाऽ होई जंदा। तिडकी दियां पपडियां बरखा दे पानियै कन्नै रूडी जंदियां जे धरत फ्ही साफ़ लिश्कन लगी पौँदी।( सफा-67 )

        9. मुर्गीखाना:-मुर्गीखाना क्हानी च क्हानीकार ने अपनी बडी खट्टी पलेटी दी भाशा च आक्खी दी ऎ जे समाज एक मुर्गीखाना गै ऎ जित्थै सब्भै माह्नू बक्ख-बक्ख वृति दे अपने-अपने स्वार्थ साधनेँ च लग्गे दे न। लोक इक-दूएं गी ठुंग्गै दे न पर शासक फिकरमंद नेईँ बल्के तमाशबीन बने दा दिक्खदा ऎ ते सगुआं खुश होँदा ऎ।

        10. तिलांजलि:-पति-पत्नी दे रिश्ते दी क्हानी जिस च इ'यै बांदे कीते दा ऎ जे एह् रिश्ते दे धागे मजबूत गै होने चाहिदे न पर जेकर मजबूत नेईँ होँगन तां लडी च परोए दे बंधनेँ दे मोती खिलरी जांगन ते फ्ही इ'नेँगी परोने बेल्लै बी ऎसियां गंढां लाने पौँदियां न जेह्डियां कुसै बेल्लै बी खुल्ली जंदियां न। ओह् रिश्ते नेईँ रौँह्दे। प्रेम चौकीदार अपनी निक्की सारी नौकरी ते लौह्के परिवार च बडा खुश हा पर पत्नी दी बेबफाई कारण घरै दा बाह्‍र रौँह्न लगी पौँदा ऎ ते खीर रिटायर्ड होने पर जिसलै उसदा जागत घर परतोई आने आस्तै जोर पांदा ऎ तां कुतै दूर चली जंदा ऎ जेह्डा घरै आह्ले गी लब्भदा नेईँ ऎ।

        11. टोडी बच्चा हाय! हाय!!:-क्हानी नजाम दी काली करतूतेँ गी गोआड़दी ऎ जिस च लुकाई अपने हक्क-हकूकेँ थमां मैहरूम ऎ उसी एह् सियासी लोक छडे लारेँ कन्नै गै पतेआई जा दे न।जे उ'नेँगी ओह् चांह्दे न पर कुसलै मिलग इसदा कोई बक्त मुकरर नेईँ ऎ।क्हानी च चित्रत इक स्वतंत्रता सनानी जेह्ड़ा 45-46 ब'रेँ थमां सरकार आसेआ थ्होने आह्ली मदाद लेई इक दफतर थमां दूए दफतर खजल होआ दा ऎ पर ओह्दी कोई सुनबाई नेईँ ऎ। उसगी उसलै थ्होडी उमीँद लगदी ऎ जिसलै मैँत्री उंदे ग्रां, स्कूलै दे 26 जनवरी दे समारोह च औँदा ऎ। पर ओह्दे भाशन बी छडे लोकेँ दी झूठै दे उच्चे झूटे गै दिँदे न। जिसलै मंत्री कोल अपनी फरियाद रखदा ऎ तां मंत्री एह् आक्खियै टाली दिँदा ऎ जे अजेँ ओह्दी बारी नेईं आई," तुस हिखी रक्खो बल्लेँ-बल्लेँ तुंदी बारी बी आई जाग।"( सफा-89 ) उसी इ'यां लगदा ऎ हाल्ली किश बी नेईँ बदलें दा उ'यै ज'नेह् गै राज ऎ जनेह् 47 ( संताली ) थमां पैह्ले हा सिर्फ नजाम गै बदलें दा ऎ सोच उ'यै गै लुट्टने आह्ली।अज्ज बी उ'यै किश ऎ।

         12. लहुऎ दा रंग:-संग्रैह् दी शीर्शक आह्ली क्हानी ऎ जेह्ड़ी समाजै दे स्वार्थी बैह्‍रुपियेँ दी सूरत सामनै आह्नी खडेरदी ऎ।ओह् मनुक्खी दर्द दी नेईँ पंशानदा ते अपने स्वार्थ दी अग्गै करी कदेँ गली-म्हल्ले, मजहब जां धर्म दी आड लेइयै इक-दूए दे लहुऎ दा दुश्मन बनी ऎ उसलै उसगी कोई ध्यान नेईँ रौँह्दा जे एह् लहू भामेँ कुसै बी कौम जां जाति दा ऎ एह्दा रंग ते होने आह्ली पीड इक बरोबर ऎ।इस क्हानी दा किरदार रामरसूल जतीम खाने च पलदा ऎ जित्थै सभने धर्म दे ञ्यांने पलदे न पर फ्ही बी उंदा कोई धर्म नेईँ ऎ जेकर कोई धर्म ऎ तां इंसानियत, हिरख-समोधै दा, जित्थै कोई नफरत दा पाठ नेईँ पढाया जंदा।पढाया जंदा ऎ तां इक-दूएं कन्नै प्यार-हिरख करना। रामरसूल जतीम खाने दे ञ्यांने गाई-गाई हिँदू-मुस्लमान सभनेँ दे घरेँ चंदा ग्राइयै आनदा ऎ पर कोई उसदे अंदर इंसानी बंड नेईँ ही ते ना गै कदेँ कुसै उसी इस नजरी कन्नै दिक्खेआ हा पर फसाद होने पर मारिया ते रामरसूल गी कोई घालऽ करी जंदा ऎ।मारिया उत्थै गै दम त्रोडी दिँदी ऎ ते रामरसूल गी जख्मी हालती च हास्पताल भर्ती कराया जंदा ऎ जित्थै उसगी लहू चढाया जंदा ऎ। पर जिसलै होश औँदी ऎ तां लहू चढाने आह्ली पाईप खोली दिँदा ऎ जिस कन्नै लहू शरीरै च चढने दी वजाए पूरेँ विस्तरे पर बिछी जंदा ऎ ओह्दे प्राण-पखेरू उडरी जंदे न। उसलै उस लहुए दा रंग कोई नेईं पंशानी सकेआ जे एह् कुस धर्म दा ऎ जां जाति दा ऎ। इत्थै क्हानीकार चिँतत ऎ जे," माह्नू चन्न तारेँ परा होई आया ऎ पर इसी धरती पर जीना की नेईँ आवा दा।" (सफा -96 )

       13. ओह्दी तस्वीर:-क्हानी उस हाडै गी बांदे करदी ऎ जिस च हर इक माह्नू अपने-आपै गी लेखक साबत करने च लग्गे दा ऎ ओह् समाजै च व्यापी दी सचाई थमां बडी दूर ऎ सच्च लिखने दी ओह्दे च हिम्मत नेईँ ऎ ते बाह्-बाही बटोरने आस्तै किश बी लिखने लेई तैयार नेईँ ऎ सच्च-झूठ जिस कन्नै छडा उसी गै लाऽ मिली सकै।पर जेकर कोई लिखने दी कोशिश बी करदा ऎ तां उसदे खलाफ लोक मोर्चा खोली ओडदे न।दुक्खी मनै कन्नै लेखक ने क्हानी रा'हेँ अपने मनै दी भडास बी कड्ढी लेदी ऎ। ते सूझाऽ बी दित्ते दा जे चित्रकारी रा'हेँ अपनी प्रतिक्रिया व्यक्त कीती जा तां माह्नू अपने मनै दे भाव बी व्यक्त करी लैँदा ऎ उसी दिक्खने आह्ला अपने-अपने साह्बेँ कन्नै गै ओह्दी व्याख्या करदा ऎ। जि'यां इस क्हानी दा पात्तर बंसी लाल इक टीचर, लेखक ऎ ते जिसलै अपने भाव पत्रेँ पर उकेरदा ऎ तां उसी पता लगदा ऎ लोकेँ गी सच्ची गल्लै पर रोह् चढदा ऎ। जिसकरी अपने मनै दे भाव व्यक्त करने आस्तै कैँवस दा स्हारा लैँदा ऎ ते ओह्दा मनना ऎ," साहित्यकार गी साम्प्रदायगत परिधि दा अतिक्रमण करियै सामान्य मनुक्खता दी धरातल पर पुज्जना चाहिदा ऎ। सारेँ मनुक्खेँ आस्तै इक आम सच्च केह् ऎ, साहित्य च इसी उजागर करना चाहिदा ऎ।" ( सफा-103 )

        14. जुग-जुग जीऎँ तूं-समाजै च संघडोँदे रिशतेँ जिँदे च पैहेँ दी भुक्ख गै सब्भ किश ऎ। मां-बब्ब धियेँ-पुत्तरेँ आस्तै म्हेशां सीसां गै दिँदे न बशक्क उं'दी औलाद उ'नेँगी भुल्ली जा भामेँ उ'नेँगी जि'न्ना मर्जी दुत्कारै पर दंदे मूहां च कदेँ बी उं'दे आस्तै निखिंद शब्द जां बदसीस नेईँ निकलदी। तूं जुग-जुग जीऎँ च बी रिश्तेँ दी कडी गी त्रुटने थमां बचाने दी कोशिश गै करदी ऎ।

     15. बतन परस्त-इक ऎसी क्हानी जेह्डी अपने देस दे प्रति जवानेँ दा जज्बा दिक्खियै हर इक देसवासी नाज मसूस करदा ऎ। एह् जवान अपनी जानेँ दी बाजी लाइयै देसै दी रक्षा करदे न।बशक्क घरै दूर रौँहदेँ न पर घरै दी याद बी सतांदी ऎ तां बी इक-दूए कन्नै मजाक टिचकौलियां करियै खुश रौँह्दे न कोई आपसी बैर-बरोध नेईँ ऎ। इस क्हानी च नजीर पवन ञ्यांनपुनेँ दे यार किट्ठे पढी-लिखियै फौजै च इक दिन लांस नायक बी बने पर नजीर बडा गै होशयार, नशाना बी ओह्दा इ'न्ना पक्का जे ओह्दे दोस्त-मित्र उसी उग्रवादी आक्खियै मजाक करदे न जे पाकिस्तान थमां ट्रेनिँग लेइयै आए दा ऎ। नजीर मनै च सोचदा ऎ जे मौका औह्ने पर ओह् दस्सी देग जे ओह् सच्चा देस भगत ऎ। ते मौका औह्ने पर सच्च गै अपनी जिँदू दी बाजी लाई दिँदा ऎ ते देसै पर औह्ने आह्ली मुसिबत थमां बचाई लैंदा ऎ।

         16. संजोग-संजोग संग्रैह् दी खीरी क्हानी ऎ जेह्दे च दस्सेआ गेदा ऎ जे संजोग माह्नू गी कुत्थै लेई जाग ते केह्डी परिस्थितियेँ च पाई ओडग इस गल्लै दा कुसै गी पता नेईँ ऎ। माह्नू उस कर्ता दे हत्थेँ दी कठपुतली ऎ जेह्डा ओह्दे बनाए दे रस्तेँ पर चलदा ऎ। पर केँईँ बारी ऎसी फाइयेँ च फसी जंदा ऎ जिसदा छुटकारा पूरी उमर तगर नेईँ होँदा। इ'यां गै इंदी क्हानी संजोग च गुज्जर परिवार जेह्डा ञ्यांनेँ दी किलकारियेँ थमां वंचत ऎ। चौधरी मेह्‍रदीन दी त्रीमत इस कमी गी बडा मसूस करदी ऎ। इ'यै ईश्वर दा निजम ऎ जे ओह् कुसै बी रूपै च कुसै गी मलाई दिँदा ऎ। इक बारी उंदे डंगर पानी पीँदे कुडी गी सिँडेँ. पर चुक्कियै सुटदा ऎ जिसकरी कुडी बेहोश होने करी अपनी जैदाशत बी भुल्ली जंदी ऎ।जिसकरी मैह्‍री दी नियत बेईमान होई जंदी ऎ ते बजाए अपने कन्नै रखने दा फैसला करी लैँदे न ते फ्ही उत्थुआं अपना डेरा दूई थांह् लेई जंदे न जित्थै उ'नेँगी कोई पंशानदा नेईँ। इ'यां कुडी दे घरै आह्ले तुप्पी-तुप्पियै ना उमीँद होई जंदे न ते इधर चौधरी-मैह्‍री दी धीऽ पाकीजा होई जंदी ऎ जुआन होने पर ओह्दा व्याह् मोबाइल स्कूलै दे मास्टर कन्नै करवाई दिँदे न। पाकीजा अपनी जिँदगी च बडी खुश ते इक बच्ची दी जनम दिँदी ऎ। रकसीना इक ध्याडे घोडे पर चढी दी दूर ग्रां आई जंदी ऎ जित्थै पिच्छे-पिच्छे पाकीजा बी पुज्जी जंदी ऎ इक बुड्ढी उसी पंशानी लैँदी ऎ जे ओह् ओह्दी कुडी ऎ। पुलसै आह्ले उंदा निपटारा करवाइयै पाकीजा गी ओह्दे माऊ-बब्बै गी सौँपन आस्तै करदे न पर जिस ध्याडै सवेरे उसी लैन औह्ना होँदा ऎ उस दिन पाकीजा अपने घरैआह्ले ते बच्ची कन्नै कुतै दूर चली जंदी ऎ।

         एह् हा संग्रैह् दी 16 क्हानियेँ दा मुसलसल जनेआ जायजा। पर मुकदी गल्ल एह् ऎ जे इंदी क्हानियां समाजै च सिर-सुआकदी, मूहं जोर होँदी बुराइयेँ दी गै चित्रत कीते दा ऎ। जिस कन्नै माह्नू बडा नराश-परेशान ऎ। पाठक इंदे थमां इ'यै उमीँद रक्खगन जे जेह्डा अनछप्पेआ साहित्य इंदे कोल पेदा ऎ, जि'यां इक बारी परतियै ( क्हानी संग्रैह् ), दो उपन्यास ( गदर ते नेत्रदान ),  ते खत लिखेआ मेँ तेरे नां ( कविता संग्रैह् ) तौले गै पाठकेँ गी पढने आस्तै मिलगन। इंदे अनछप्पे साहित्य थमां कैफा लाया जाई सकदा ऎ जे इ'नेँ अपने-आपै गी पूरी चाल्ली कन्नै डोगरी भाशा गी समर्पित करी ओडेदा ऎ।
                                                                           -----------------------
                                           Dr. Chanchal Bhasin
                                           Lecturer in Dogri

"हाशिये पर" उपन्यास च वर्ग-संघर्श- डॉ . चंचल भसीन

                                         "हाशिये पर" उपन्यास च वर्ग-संघर्श
                       
                                                  डॉ . चंचल भसीन
      डोगरी साहित्य लगातार अपनी गैँ अगडी बधांदा जा करदा ऎ जित्थै पराने साहित्यकारेँ दी सोच ते तजरबे न उत्थै गै नमीँ पीढी दे लखारी बी अपनी का'न्नी गी आधुनिकता दी सोच कन्नै पुखता करदे आवा दे न। जिस कन्नै डोगरी साहित्य दी हर इक विधा च लगातार इजाफा होआ दा ऎ।
     सन् 2010 ई. च डोगरी लेखन दे सखेतरू ते तजरबेँ दे गूढे दे नौजुआन लखारी शैलेन्द्र सिँह हुंदा "हाशिये पर" 161सफेँ दा पैह्ले प्रकाशत उपन्यास, जेह्डा डोगरी साहित्य दी उपन्यास विधा च आई रलेआ। एह् एक समाजक-यर्थाथवादी उपन्यास ऎ जेह्डा अज्ज दे समाजै दी नशानदेही करदा ऎ।उपन्यासकार दा बशक्क प्रकाशत रूपै च औह्ने आह्ला पैह्ला उपन्यास ऎ पर पढियै नेईँ लगदा जे एह् इंदी पैह्ली कृति ऎ। इस उपन्यास दा कथानक सशक्त ते अज्जै दे समाजै च लोकेँ कन्नै होने आह्ली बेन्याई ते ओह् परोआर जेह्डा रोज-मर्रा दी जिँदगी च संघर्श करियै बी द'ऊं बेल्लेँ दी रूट्टी दा जुगाड नेईँ करी सकदा, जेह्डा ध्याडी च सौ बारी जींदा ते मरदा ऎ। उसदी जीवनै दी गड्डी दी ओह् गति नेईँ मिलदी जे ओह् कम्म करियै चैन कन्नै सेई सकै। ओह् हर बेल्लै इस्सै सोच च पेआ रौह्न्दा ऎ जे हून ते मेह्नत करियै खाई लेई ऎ, अगले पैह्‍र बी उस्सी नसीब होई सकग? "हाशिये पर" उपन्यास दा एह् परोआर मेह्नत ते सभने थमां मती करदा ऎ पर उसगी उसदी मेह्नत दा मेह्नताना इ'न्ना नेईँ मिलदा जे ओह् अपनी गुजर-बसर ठीक चाल्ली करी सकै।
        उपन्यासै दे नायक मदन च'ऊं ञ्‍यांनेँ दा बब्ब ऎ जेह्दे दो जागत ( काम्बा/ कमल, लौह्कू ) ते दो धीआं      ( कमलेश ते उषा ) न। ओह् परोआर दी पालमा दरेआ थमां सोहा-सेआल मच्छियां फडिये करदा ऎ।पर, अपनी इस कमाई कन्नै ओह्दे घरै दा गुजारा बडा गै मुश्कल होँदा ऎ जिसगी पूरने आस्तै ओह् कदेँ मिस्त्रियेँ कन्नै बी ध्याडियां लाई लैँदा ऎ। मदन दी त्रीमत कान्ता बी हर बेल्लै उसदा साथ छाए आह्ला लेखा दिँदी ऎ। कोई बी परोआरै पर जिसलै औक्खी-भारी बनी औँदी ऎ तां उ'नेँगी तत्ती ब्हा नेईँ लग्गन दिँदी ऎ। पर उसदी माली हालत फ्ही नेईँ सुधरदी। सरकार आसेआ बी गरीब-गुरबेँ लेई बथ्हेरियां स्कीमां अमल च आंदियां जंदियां न पर, एह् योजनां लागू होने थमां उ'नेँ आम माह्नू तगर नेईँ पुज्जदा ऎ। इसदा फैदा उ'नेँ लोकेँ दी गै थ्होँदा ऎ जेह्डे चत्तर-चनार न। इ'यां गै कच्चे कोठे आह्लेँ लोकेँ गी पक्के कमरे पाने आस्तै चैक मिलने होँदे न। मदन इस्सै हिक्खी सभने थमां पैह्ले उस थाह्‍र पर बे'ई जंदा ऎ कुश्बा बाद च भीड होई जानी ऎ ते उसी जगाऽ नेईँ मिलन लगी।जिसलै चैक मिलना शुरू होँदे न ते सभनेँ दे नां बारो-बारी लैते जंदे न। पर मदन दा नां उस च नेईँ बोलदे। चैक उ'नेँ लोकेँ गी बी मिली जंदे न जेह्डे इसदे हक्कदार नेईँ हे।मदन बशक्क ग्रां च सभनेँ थमां गरीब ऎ पर उसी चैक नेईँ मिलदा ऎ। ओह् बडा सिद्धा ते ईमानदार माह्नू ऎ। उसनै ओह् कार्ड गै नेईँ बनोआए दा जेह्डा सरकार गरीबी रेखा थमां थल्लै रौह्ने आह्ले लोकेँ दे बनोआंदी ऎ।उ'नेँ दी गै इस सुविधा दा फैदा थ्होँदा ऎ। पर, मदन इ'नेँ सब्भै गल्लेँ थमां अन्जान हा कीजे उन्नै इ'यै ज'नेइयेँ गल्लेँ आह्ली बक्खी ते कदेँ धेआन गै नेईँ दित्ता जां इ'यां आक्खी लैओ जे उसी कम्मै थमां कदेँ बे'ल गै नेईँ लग्गी ते लोकेँ जे लोकेँ च जाइयै ते उंदे कन्नै गल्ल-बात करी सकै।
        उपन्यासै मताबक इ'यां दूई योजना नरेगा ( National Rural Employment Guarantee Scheme ) जिसलै ग्रां च औंदी ऎ जिस दे तैह्त सौ दिन मजदूरी थ्होने दे बारे च मदन गी पता चलदा ऎ तां इ'न्ना खुश होँदा ऎ जे उसी किश बी सुझदा नेईँ ऎ। ओह्दी उम्मीँदेँ दी गुड्डी ऎसी शमानै पर चढन लगी पौँदी ऎ जे इथूं तगर उम्मीँद लाई बौह्न्दा ऎ जे हून उब्बी सरकारी ध्याडीदार बनने परैँत पेँशन नौकरी थमां गै सेवानिवृत होग। पर, उसी अखीर च उत्थुआ बी ना-उम्मीँदी गै हत्थ लगदी ऎ। इस योजना दे अंतर्गत जेह्डे बी कम्म ग्रां च ठेकेदार मुख्तयार सिँह शुरू करोआंदा उंदी सूची बी उस्सै आसेआ गै बनाई जंदी ऎ। ओह् मते ठेकेदार दे गै लोक न जेह्डे कदेँ मिट्टी कन्नै छोह्ते दे बी नेईँ हैन। ओह् सिर्फ ठेकेदार कन्नै रे'इयै बदमाशी गै करदे न।उ'नेँगी पैहेँ दी कोई परवाह नेईँ ऎ। ओह् मजदूरेँ दे पैहे कट्टियै गै अपने शुभचिँतकेँ गी दिँदे न। ठेकेदार जेह्डे बी मजदूरेँ गी ध्याडी उप्पर लांदा ऎ उ'नेँगी 70 रपेऽ दे स्हावे ध्याडी दिँदा ऎ।पर, सरकार आसेआ 100 रपेऽ ध्याडी इक मजदूर दी मुकरर कीती गेदी ऎ। मदन बी इस योजना दे तैह्त इक दिन मजदूरी करन जंदा ऎ पर उसी किश एह् गल्ल रास नेईँ औँदी कीजे इस कम्मै च इक ते रोज ध्याडी दे पैहे नेईँ मिलदे ते दूआ ओह् चैक दे रूपै च। इ'यां ओह्दे घरै दा गजारा नेईँ चली सकदा। उसी ते रोज ध्याडी लाने परैँत पैहे चाहिदे न जिस कन्नै ओह्दे घरै दा सरिस्ता चली सकै। इ'यां इक रोज मदन जिसलै ध्याडी लाई ते लैँदा ऎ पर ओह्दे घर उस दिन रुट्टी आस्तै मुश्कल होई जंदा ऎ। तरकालेँ सोद्धा-पत्तर आनने आस्तै मंगे मिस्त्री दे घरै 50 रपेऽ दोआर लेइयै आनदा ऎ तां करी ओह्दे घरै दा गजारा चलदा ऎ। बाद च जेह्डे मदन गी उस ध्याडी दे पैहे मिलदे न ओह् ओह्दे कोई कारी नेईँ औँदे कीजे ओह् 70 रपेऽ दा चैक, जिस आस्तै उसी बैँक च चैक जमा कराइयै ते मिलने हे। ओह् ऎ ओह्दे बस्स दा रोग नेईँ हा। कीजे ओह्दे आस्तै बी उसी बैँक च खाता खलाने आस्तै 40-50 रपेऽ दा खर्च करना पौना हा जिसकरी उन्नै इ'नेँ पैहेँ दे बारै च खेआल गै छोडी ओडेआ।
        मदन हर बेल्लै चौरे-पैह्‍र झूरेँ च फसेँ दा रौंह्दा ऎ। सोचदा ऎ उ'न्नै ते अपनी पूरी उमर ना-समझी च कड्ढी ओडी ऎ। ओह्दे ञ्यांने बी इ'यां गै पूरी उमर कड्ढगन? उसी इब्बी मनै च बेचैनी रौह्न्दी ऎ जे ओह् आपूं जे पढी नेईँ सकेआ, पर अपने ञ्यांनेँ गी ज़रूर गै पढाग। मदन ञ्यांनेँ दी पढाई आस्तै कदेँ बी पिच्छै नेईँ रौँह्दा। भामेँ इंदे आस्तै कुतूआं बी मदद की नेईँ लैनी पवै। उसदे ञ्यांनेँ बी बडे सेआने ते मेह्नती जेह्डे मां-बब्बै दी माली हालत कन्नै बाकफ हे। उ'ब्बी इस गल्लै गी धेआने च रक्खियै पढाई च शैल मेह्नत करदे न। मदन दे घर उसलै थ्होडी ज'नेईँ खुशी दी रिश्म लिश्कदी लब्भदी ऎ जिसलै ओह्दा बड्डा जागत कमल ( काम्बा ) पढाई च अब्बल औह्न लगदा ऎ ते इंजीनियरिँग दे दाखले आस्तै पेपर बी पास करी लैँदा ऎ। उसदे घर खुशी च फसाई लैँदा ऎ। जागतै नै पेपर ते पास करी लेआ पर इसदे दाखले आस्तै फीस कुतूआं औह्ग? उसी कोई बत्त नेईँ लब्भदी ते फ्ही इक बारी अपने शरीक भ्रा तरसेम कोल गै जंदा ऎ। तरसेम शुरू थमां गै मदन दे परोआरै दे दु'थड कट्टदा आवा दा ऎ। तरसेम फ्ही इक बारी ओह्दी मदाद करने च पिच्छै नेईँ रौँह्दा ऎ। मदन दा बड्डा जागत कमल जिसलै श्रीनगर इंजीनियरिँग दी पढाई आस्तै जंदा ऎ ओह् अपनी पढाई च कोई फर्क नेईँ पौह्न दिँदा। सगुआं पैह्ले थमां बी खूब दिलचस्पी कन्नै पढदा ऎ। पैह्ले समैस्टर च गै सभनेँ जागतेँ थमां अब्बल नम्बर लेइयै पास होँदा ऎ। जेह्डी उसी चैँता सता दी ही जे दूए समैस्टर च फीस कि'यां देनी ऎ? ओह्दी फीस दा जुगाड बी बनी जंदा ऎ। कमल गी अब्बल औह्ने पर सरकारी बजीफा बी मिलन लगी पौँदा ऎ। उंदे घरै च खुशी दी इक किरण लब्भना शुरु होई जंदी ऎ।हून कमल दी बी उम्मीँद जागी पौँदी ऎ जे उंदे दिन बी फिरी जागन।उज्जल भविक्ख लब्भन लगदा ऎ। इ'यां गै खीरै च उपन्यासकार दे शब्देँ च बी इयै जे " अजेँ हून शुरूआत होई ऎ।" लगदा ऎ जे इक नमां जुग बनग जिस च एह् परोआर खुशी-खुशी रौह्ग।
    उपन्यासै च विवेचत-वर्ग:-"हाशिये पर" उपन्यास गी समाजक-यर्थाथवादी उपन्यासेँ दी श्रेणी च रक्खेआ जाई सकदा ऎ। उपन्यासकार ने अज्जै दे दौर च वर्गेँ बश्कार होने आह्ली तनोतनी दा बखूबी कन्नै वर्णन कीते दा ऎ। इस समाजै च अजेँ बी मतेँ सारेँ ऎसे माह्नू हैन जेह्डे अपने फैदे आस्तै लोकेँ गी गुलाम गै बनाइयै रक्खना चाह्न्दे न। इत्थूं तगर जे अपने स्वार्थ लेई इंदा बजूद तगर खत्म करने च बी कोई नेईँ छोडदे। ओह् नित्त नमेँ हरबेँ कन्नै लोकेँ गी दबाइयै रखदे न।इस उपन्यास च दो वर्गेँ बश्कार गै टाकरा ऎ। एह् वर्ग न: 1. शोशक वर्ग, 2. शोशत वर्ग।
      1. शोशक वर्ग:-उपन्यासै च चित्रत शोशक वर्ग दे अंतर्गत जिमीँदार, ठेकेदार, मंत्री वर्ग वगैरा औंदे न जेह्डे जुरम बे-न्याई ज'नेह् हरबेँ बरतियै लोकेँ गी लुट्टे-धरूडै दे न।
         जिमीँदार वर्ग:- "हाशिये पर" उपन्यासै च जैलदार दयाराम इलाके दा सभनेँ थमां सौक्खा (अमीर) रुतबे आह्ला जिमीँदार ऎ। एह्दा ग्रां दे गरीब काम्मेँ उप्पर खासा दबदबा ऎ जेह्डे उंदे घर कम्म करदे न। एह् कम्म चाहे जिमीँदारी दा करदे न भामेँ घरै च काम्मेँ न। एह् उ'नेँ मजलूम काम्मेँ पर दब्बियै शोशन करदा ऎ।इत्थूं तगर जे अपने घर लग्गे दे काम्मेँ दे जागतेँ गी बी पढन नेईँ दिँदा ऎ। एह्दा इयै सोचना ऎ जे इंदे जागत पढी-लिखी गे तां उंदे घरेँ च कम्म करने आस्तै काम्मेँ नेईं लब्भगन। इ'यां गै जदूं उपन्यासै दा इक चरित्र शैलोराम दा जागत अठमीँ पास करी लैँदा ऎ तां ओह् जैलदार दयाराम गी जागतै दी नौकरी लोआने आस्तै आक्खदा ते उसदे तेबर गै बदली जंदे न। ओह्दा द'बकजन निकली जंदा ऎ ते आक्खदा ऎ," पढना-लिखना ते ठीक ऎ पर तेरा मुडा बी नौकरी करन लगुग ते ग्रां च झीरेँ दा कम्म कु'न करग? चल इत्थूं दा। लेई जा अपने मुडे गी बी। इसी अपने कन्नै कम्मै पर ला। जे इ'यां गै तुंदे जागत पढी-लिखियै नौकरियां करन लगे ते तां तौले गै ग्रां दे सारे काम्मी खत्म होई जाड.न।" ( सफा-29 ) उसी इयै डर लगी पौँदा ऎ जे जिसलै इंदे घरै च कोई पौह्ग तां ते काम्मेँ गै नेईँ लब्भड.न? जेह्डा इ'न्ना कम्म करदे न।
       ठेकेदार वर्ग:-इस उपन्यासै दा ठेकेदार वर्ग दा खुल्लियै शोशन करदा ऎ। उस कश ओह् सब्भै चालां हैन बरतने आस्तै जेह्दे कन्नै लोकेँ दा शोशन कीता जाई सकता ऎ।जि'यां उपन्यासै च ठेकेदार अपने मजदूरेँ थमां कम्म ते डट्टियै लैँदा ऎ पर उ'नेँगी उजरत पूरी नेईँ दिँदा ऎ। इस करी इ'नेँ लोकेँ दा गजारा बी बडा गै मुश्कल होँदा ऎ। उपन्यासै दा ठेकेदार मुख्तयार सिँह ते सरपंच गुलचैन सिँह दे अंदर भ्रश्टाचार दी वृति इ'न्नी प्रबल ऎ जे ओह् कुसै हद्दा तगर बी जाई सकदे न। इ'नेँगी इ'न्ना बी धेआन नेईँ रौँह्दा जे जिनेँ मजदूरेँ दे पैहे उप्पर एह् ऎश करदे न, उंदे ञ्यांनेँ गी एह् जुक्केँ आंगर चूस्सै दे न। उ'नेँ मजदूरेँ दे ञ्यांनेँ गी ओह् स्हूलतां नेईँ मिलदियां जेह्डियां ओह् चांह्दे न। जि'यां नरेगा योजना दे तैह्त सरकार मजदूरेँ दी ध्याडी 100 रपेऽ मुकरर करदी ऎ पर उ'नेँगी सौ रपेऽ मिलदी नेईँ ऎ।ठेकेदार सब्भै मजदूरेँ गी 70 रपेऽ दिँदा ऎ। इ'यां हर इक मजदूर थमां 30 रपेऽ कट्टी लैते जंदे न।एह् गल्ल मजदूरेँ गी बी पता ऎ पर बोलने दी हिम्मत कोई नेईँ करदा।सगुआं ठेकेदार अग्गै कम्म कराने आह्ला मेट रशपाल मजदूर उप्पर झूठा गै रोब पाइयै आक्खदा ऎ," सरकार द्वारा इक दिनै दी मजदूरी सत्तर रपेऽ तैह् होई ऎ। एह्दे कोला जादै मजदूरी कुसै गी बी नेईँ दित्ती जाई सकदी ते नरेगा योजना दे मैह्त कीते जाने आह्ले कम्मेँ च ते अस लिखा-पढी च जादै मजदूर दस्सियै बी जादै पैसे कड्ढियै तुसेँगी सौ रपेऽ धियाडी नेईँ देई सकदे कीजे एह्दे च तुंदी मजदूरी दा भुगतान बैँकेँ दे जरिये होना ऎ।"( सफा-73 ) मुख्तयार सिँह ते सरपंच गुलचैन सिँह ग्रां च औह्ने आह्ली कुसै बी सरकारी योजना दे तैह्त जेह्डे बी कम्म करोआंदे न उसदे ठेके कुसै होर गी लैन नेईं दिँदे, कीजे ग्रां च उंदा गै रसूक ऎ।इत्थूं तगर जे सरकार तगर उंदी पौंह्च ऎ। जिसकरी ग्रां दे लोक उंदे अग्गै बोलने दी जुरत नेईँ करदे। एह् ठेकेदार अपनी मनमर्जी गै करदे न जेह्डे ठेके लैँदे न, जेह्डे मनेआद थमां पैह्ले गै भज्जी-त्रुट्टी जंदे न।जि'यां,"डेढ साल पैह्ले गुलचैन सिँह न अपने ग्रां नैह्‍रै दी इक पुली बनोआई ही। ओह्दे च सीमेँट ते नां-मातर गै लाए दा हा। इसकरी डेढ सालेँ च गै पुली त्रुट्टी गेई। पुली दे बक्खियेँ आह्ली अट्ठ इंच उच्ची ब'न्नी ते कदुंएं दी घस्सी गेई दी ऎ। ( सफा-45 )
       मंत्री वर्ग:-नेता लोकेँ दा शुमार बी शोशक वर्ग च गै होँदा ऎ कीजे एह् लोक बी आम-लुकाई गी सुलझे दे ढंगै कन्नै मत्तू बनांदे न। भलोके लोक इंदी मिट्ठी-मिट्ठी गल्लेँ च पलचोई जंदे न। एह् मंत्री लोक गल्लेँ दा ऎसा मकडजाल बनांदे न जे लोक इस च फसी जंदे न। उ'नेँगी पता गै नेईँ लगदा जे एह् मंत्री लोक उ'नेँगी अपनी गल्लेँ दे जाल च फसा दे न जेह्डियां ओह् गल्लां करियै लोकेँ गी पलचांदे न दरअसल ओह इक छलावा ऎ, छडा लोकेँ गी पतेआने दा हरबा ऎ। ना गै उ'ने गल्लें गी पूरा करने दी उंदी कोई मंशा होँदी ऎ। भलोके लोक मंत्रियेँ दे झूठेँ कोल-करारेँ च फसी जंदे न, ओह् उंदे उप्पर पूरा भरोसा करन लगी पौँदे न, जे हून असेँगी इ'नेँ सब्भै किश देई ओडना ऎ पर जिसलै एह् सब्भ किश नेईँ मिलदा तां शोशत वर्ग दे मनेँ च इक खिँझ भरोचन लगी पौँदी ऎ। जि'यां जिसलै मदन गी पक्का कोठा बनाने आस्तै चैक नेईँ मिलदा ते उसदे मनै च केँईँ सुआल कुरबल-कुरबल करन लगी पौँदे न।सोचदा ऎ," अजेँ थोह्डा चिर पैह्ले गै ते मंत्री जी होरेँ आक्खेआ ऎ जे उंदे राज च कोई बी बगैर कोठे जां कच्चे कोठे च नेईँ रौह्ग।सारे कच्चे कोठे च रौह्ने आह्ले परिवारेँ गी पक्का कमरा बनाने आस्तै रपे दित्ते जाड.न। मेँ ते कुल्ली च गै रौह्ना। मेरी कुल्ली ते कच्चे कोठे कोला बी नफिट्ट ऎ।" ( सफा-54 ) जिनेँगी पक्के कमरे दा घर बनाने आह्ली योजना च चैक मिलदे न ओह् सब्भै मदन थमां थोह्डे बेह्तर गै होँदे न।
       शोशत वर्ग:-शोशत वर्ग ओह् वर्ग जेह्डा इस उप्पर होने आह्ले जुरम बे-न्याई गी कुदरत दी मार ते भागेँ दा अंश समझियै अपनी झोल्ली च पाई लैँदा ऎ।"हाशिये पर" उपन्यासै च इस वर्ग दे अंतर्गत मजदूर ते काम्मेँ औँदे न जेह्डे अपने हाकमेँ दे इशारेँ पर कठपुतली आह्ला लेखा नचदे रौँह्दे न। एह् इस गल्ल थमां अंजान न जे शोशक वर्ग गी सिनकू आह्ला लेखा लग्गे दा ऎ जि'न्नै इ'नेँगी अंदरोँ-अंदरी भुग्गा करी ओडेदा ऎ।
मजदूर ते काम्मेँ:-इस उपन्यासै च मजदूर ते काम्मेँ दिन-काट्टी गै करा दे न इ'नेँगी ओह् आह्ले हक्क-हकूक नेईँ मिलदे जेह्डे इक आम आदमी गी मिलने चाहिदे न। जि'यां उपन्यासै मताबक सन् 1971ई. गी जिसलै सरकार आसेआ काम्मी-करसानेँ गी जेह्डे जिमीँदारेँ दे घर राही-बाही दा कम्म करदे हे उ'नेँगी जिमीँ दे पट्टे दित्ते गे हे तां तरखान, लोहार ते झीर-कमेहार बगैरा मते सारेँ काम्मियेँ गी पट्टे नेईँ हे मिले कीजे एह् जमीनेँ दी राही-बाही नेईँ हे करदे बशक्क खेतरेँ च कम्म करने आह्ले थमां नखिँद्द समझेआ जंदा ऎ। मदन दा बब्ब सरदारी लाल ग्रां दा मन्ने दा काम्मी पर जमीनेँ दे पट्टे नेईँ मिलदे कीजे उन्नै सारी उमर खेतरेँ च कम्म करने आह्ले काम्मी-करसानेँ गी पानी ते रुट्टी गै बनाइयै खलाई ऎ। उसी म्हेशां इस गल्लै दा अफसोस रौँह्दा ऎ," अस बी खेतरै च कम्म करदे रेह् आं पर फरक सिरफ इ'न्ना गै हा जे असेँ अपने हत्थै च दराटी निही पकडी। दराटी आह्ले ते हल बाह्ने आह्लेँ हर करसानेँ गी पानी पलेआंदे हे। व्याहेँ-कारजेँ च कम्म करदे हे। इब्बी सरकार दा कोई न्यांऽ नेईं ते इक ग्रां च इक गी जमीन दित्ती ते इक गी किश बी नेईँ।" (सफा- 94)
        इस उपन्यासै च लोकराज च बी सुआर्थी सुआतम आह्ले लोक अपना रुतबा बनाई रखने आस्तै गरीब-गुरबेँ गी अपनी मर्जी कन्नै जीन बी नेईँ दिँदे।इत्थूं तगर जे एह् लोक इंदा कम्म जां इंदे आक्खे मताबक नेईँ चलन तां कुतै-ना-कुतै ऎसी मार देई जंदे न जे पूरी उमर इ'नेँगी भुगतना पेई जंदा ऎ। उपन्यासकार मताबक जिसलै कच्चे कोठे दे थाह्‍रै पक्के कोठे बनाई देने आह्ली योजना सरकार बजूद च आनदी ऎ तां फिमू ते बलदेव उपन्यासै दे पात्तरेँ दे नां उस सूची च शामल नेईं कीते जंदे कीजे इ'नेँ, ठेकेदार गुलचैन सिँह दे आक्खने मताबक चुनांऽ च बोट नेईँ हे पाए। जि'यां," फिमू ते बलदेव दा नां गरीबी रेखा कोला थल्लै रौह्ने आह्ले परिवारेँ दी सूची च इसकरी नेईँ आया कीजे इ'नेँ सरपंच गुलचैन सिँह दे आक्खने उप्पर बी पिच्छले चुनांए च बोट दूए उम्मीँदवार गी दित्ते हे। (सफा- 108)
       उपन्यासै च संघर्श दे कारण:-उपन्यासै च संघर्श दे मूल कारण पात्तरेँ दी अनपढता ते उंदी पसमांदी आर्थक स्थिति गै ऎ। जिस कारण लोकेँ गी सैह्कदे-छडकदे दुक्ख-कसाले जरदे होई दिनै गी धक्का देआ दे न। रसूक आह्ले लोक इ'नेँगी कुतै सूखै दा साह् बी नेईँ लैन दिँदे। ओह् हर इक चाल ते अपनी शैतानी सूझबूझ कन्नै, केईँ बारी लताडियै, ते केँईँ बारी मिट्ठी-मिट्ठी गल्लेँ च फसाई लैँदे न। पर जिसलै अनपढ लोकेँ गी लगदा ऎ जे हून इ'नेँ चालबाजेँ अग्गै इंदी कोई पेश नेईँ चलन लगी तां इंदा बरोघ करने दी बजाए अपने भागेँ दी गै दोश दिँदे होई सबर गी गले लाई लैँदे न। जि'यां मदन गी चैक नेईँ मिलने पर सबर गै करना पौँदा ऎ ते सोचदा ऎ," मेरे कोला पिच्छले जनम पता नेईँ केह्डे कुतै माडे कर्म होए दे न, जेहडा भगवान साढे पर नाराज ऎ। जौह्ले ओह् देग, औह्लै गै मिलना। जिसलै ओह् साढा पक्का घर बनाग, उसलै गै घर बनना ऎ।" (सफा -61)
एह् लोक पढे-लिखे दे नेईँ हैन जिसकरी कुसै बी चाल्ली दी सरकारी योजना दा इ'नेँगी कोई लाऽ नेईँ होँदा। इ'यां गै सरदारी लाल इक मेह्नती काम्मा ऎ ते पर अनपढ होने करी उसी ओह् दाबपेच नेईँ औँदे उ'ब्बी अपने नां दी गरदौरी मिसलेँ पर चढाई लैँदा जेह्दे कन्नै उसी बी जिमीँ दा पट्टा मिलदा। सरदारी लाल आंपू ते अनपढ हा उ'न्न अपने जागत मदन गी बी नेईँ पढाया। सगुआं उस्सी बी उयै कम्म सखाई ओडदा ऎ जेह्डा आंपू करदा हा। इक बारी जैलदार दयाराम आसेआ शाबाशी दिँदा ऎ। उपन्यासै अनुसार," जैलदार दयाराम कोला शाबाशी सुनियै सरदारी लाल ते मदन दी कोई हद्द नेईँ रेही। सरदारी लाल दी छाती फुल्लियै चैडी होई गेई। जैलदार दयाराम कोला शाबाशी कुसै बिरले काम्मी-कम्मे दी गै मिलदी ऎ उब्बी उसलै जिसलै जैलदार बडा खुश होयै।" (सफा -28) लगदा ऎ जे कदेँ कुसै ने इंदे कम्मै दी कदर गै नेईँ पाई जिसकरी सरदारी लाल किश मती गै उम्मीँद लाई लैँदा ऎ। लोकेँ दी अनपढता कारण गै इंदी आर्थक स्थिति बडी गै माडी ऎ।
      निश्कर्श:-मुकदी गल्ल एह् ऎ जे हर इक साहित्यकार अपने जुगै थमां प्रभावत होँदा ऎ।ओह् उस बेल्ले दा परिस्थितियेँ दा गुलाम नेईँ होँदा ऎ।सगुआं ओह् उ'नेँ चंगी-माडी परिस्थितियेँ दा नचोड कड्ढियै, उस च उ'नेँ हालातेँ गी बदलनेँ गी समर्थ बी रखदा ऎ। इ'यां गै "हाशिये पर" उपन्यासै दे उपन्यासकार शैलेन्द्र सिँह होर अपनी अभिव्यक्ति दे आधार पर मनुक्खी हिरदेँ गी छूनेँ च सफल होए दे न। इ'नेँ इ'न्नी मसरुफियत, हर बेल्लै हाजर ते खडुत्त रौह्ने आह्ली नौकरी दे बाबजूद, अपनी मां बोल्ली च उपन्यास रचियै इक सराह्नेजोग कम्म कीते दा ऎ। एह् उ'नेँ लखारियेँ आस्तै इक मार्गदर्शन बी ऎ जे भामेँ जिन्नी मर्जी मसरुफियत की नेईँ होवै फ्ही बी समां कड्ढियै भाशा दी सेवा कीती जाई सकदी ऎ।अग्गै बी डोगरी भाशा दे पाठक इंदे थमां इयै उम्मीँद करड.न जे इयै ज'नेह् जीवंत विशेँ पर उ'नेँगी अग्गै बी पढने लेई बिना बकफे किश-ना-किश मिलदा गै र'वै। शैलेन्द्र सिँह होरेँ गी मेरी तरफै इयै शुभकामनां न जे एह् अपनी नौकरी ते साहित्य खेतरै च उच्चकोटि पर विराजमान होन।
________________
डॉ . चंचल भसीन
लैक्चरर डोगरी