'देई दे' (डॉ. चंचल भसीन)

           'देई दे’
मिगी मेरी जिंदगी दी ब्हार देई दे
माऊ दा प्यार ते बब्बै दा दुलार देई दे
जिंदगी दी धुप्प ते छांऽ देई दे
मिगी मेरे जीने दा सार देई दे।
         मिगी मेरी जिंदगी दी ब्हार देई दे।
सोचने दी सच्ची सौग़ात देई दे
अक्खर मेरी झोली बेशुमार देई दे
सभनें दी बना ऐसी व्यवहार देई दे
जीवन होवै साकार, ऐसा बरदान देई दे
        मिगी मेरी जिंदगी दी ब्हार देई दे।
द’ऊं बेल्ले दी रूट्टी दा जुगाड़ देई दे,
मंगां नेईं किश, चरणें च थाहर देई दे
बागें च भांत-सभांतड़े फुल्लें दी ब्हार देई दे
आपूं चें सभनें गी प्यार देई दे
        मिगी मेरी जिंदगी दी ब्हार देई दे।
        माऊ दा प्यार ते बब्बै दा दुलार देई दे।।
                  (डॉ. चंचल भसीन)

मां (डॉ. चंचल भसीन)

           “मां”

माँ-माँ मिं गल्ल सनाऽ, 

की गेई तूं ओह्के थाह्र,

जित्थुआं नेईं परतोंदा कोई घर। 

बिट्ट-बिट्ट दिक्खदा, तुगी बेह्ड़ा,

कदूं औनै, हुन तूं ढेरै। 

चौका नेईं, हुन कोई कड्डै,

सत्त-सबेल्लै, नेईं कोई उट्ठै। 

सुच्ची रूट्टी, कु’न्न पका,

ख़ुशी-ख़ुशी, सभनें गी खलाऽ। 

हर’लै रौंह्दा, इ’यै भेड़, 

लग्गे दा, भांडें दा ढेर। 

रक्खी दी तेरी, हर इक शैह्,

बलगै दी ऐ, तेरी राह्। 

      हिक्खी तेरी हर’लै रौह्ंदी,

      की नेईं तूं घर परतोंदी?

मड़िये,फेरा ते कदें पायां,

सभनें गी फ्ही जीना सिखायां।

       फड़ी लेई ऐ तूं कैसी अड़ी, 

      तेरे बाज  नेईं निकलदी घड़ी। 

फ्ही आइयै घरै गी सजायां। 

जीने दी आस जगायां। 

      माँ-माँ मिं गल्ल सनाऽ, 

की गेई तूं ओह्के थाह्र,

जित्थुआं नेईं परतोंदा कोई घर। 

    ( डॉ. चंचल भसीन)

झत्त (डॉ. चंचल भसीन)

                                       “झत्त”

उट्ठदे गै बड्डलै 

जिंदगी कन्नै 

होई गेई झत्त,

दिक्खेआ बड़े गै कोला,

कम्मै आह्ली दे मुंहै’ पर

मायूसी, थकावट,

चैंता-झूरे। 

पर कुसैगी अपनी,

थकावट, मायूसी,

चैंता-झूरें ‘नै 

करदी नेईं, 

मायूस,

औंदे गै,

भरदी अपने अंदर 

फुर्ती,

कम्मै गी झटपट 

जुटी,

मकाई-समेटियै 

ते 

देई जंदी सभनें दे

चेहरें ‘पर 

ख़ुशी

अनसम्भा पेआर,

फ्ही 

लेई जंदी

अपने लेई

थकावट, मायूसी,

चैंता ते झूरे।

                              (डॉ. चंचल भसीन)