“हिरखै दी पीड़” ( डॉ. चंचल भसीन )
साहित्य दी कुसै बी विधा दा अंकुर रचनाकार दे मनै च कुरजने आह्ले ओह् भाव जेह्ड़े उसदे मन-मस्तिष्क गी जकूड़ी लैंदे न ते कुरबल-कुरबल करदे होई जाई काकलें उप्पर सज्जियै बेई जंदे न जां इ’यां आक्खी लैओ जे एह हिरदे च फुट्टने आह्ली आप-मुहारी सर जेह्डी पता नेईं किस पासै मुड़ी जाह्ग। ओह् केह्डा रूप धारण करदे न। एह् केईं बारी रचनाकार दी अपनी रूचि अनुसार बी नेई होंदा ऐ जेह्ड़ा ओह उ’नेंगी कविता, उपन्यास जां नाटक दा आकार दिंदा ऐ।
इ’यां तारा दानपुरी होर जेह्ड़े डोगरी दे नांबर साहित्यकार न जि’नें इसलै तगर दो उपन्यास- जीवनदान, चेतना, दो क्हानी संग्रैह- केईं जनम, लहुऐ दे रंग, द’ऊं कताबें दा अनुवाद- इक बंगाली उपन्यास दा सादा लिफाफा ते न्यारी भगती काव्य संग्रैह ते “हिरखै दी पीड़” काव्य संग्रैह जेह्डा तुन्दे हत्थें च 2015 च प्रकाशित होइयै आया ऐ। उ’यां ते इ’नें अपनी पंशान उपन्यासकार ते क्हानीकार दे रूपै च बनाई दी ऐ। इन्दे मताबक बीहें-बाइयें दी उमरी च गै इनें कवता लिखना शुरू करी दित्ती जिसलै भारत-पाकिस्तान दे ब’न्ने पर तनोतनी आहला मौह्ल हा ते इंदे अंदर बी अपनी देस-भक्ति दा जज्बा उछकडियां भरन लगी पेआ जेह्डा हिंदी ते अंग्रेजी दी कवता राहें सामने आया पर फ्ही इ’न्दा रूझान उपन्यास ते क्हानी आह्ली बक्खी कुसलै होई गेआ इस लेई एह आपूं बी हैरान न। जिस दा नतीजा एह होआ जे इन्दी कवताएं गी संग्रैह दा रूप धारण करने लेई काफी अरसा इन्तजार करना पेआ। “हिरखै दी पीड़” काव्य संग्रैह च 67 कवतां बक्ख-बक्ख मार्मक विशें दे रंगें च रंगोई दियां न। अर्थात कवि दे मनै च हिरखै दी पीड़, जेह्दे चेतें उसी आनी घेरदे न ते ओह्दी उदासी दा कारण बनदे न। मती कवताएँ च कवि उदासी दे घेरे च फसे दा गै लभदा ऐ इ‘यां संग्रैह दी पैह्ली कवता थमां गै पता लगदा ऐ जे इंदी कवता नै अदूं जनम लैता जदूं पीड़ें आनियै इ’नेंगी तंग कीता ते ओह् पड़ास कवता दे रूपै च आई गेई। जि’यां-
में अदूं गै लिखना लाया,
पीड़ै ने मिगी जदूं सताया।
कुरजी-कुरजी पीड़ै मेरी,
अक्खर-अक्खर रूप बनाया। ( 19 )
ओह प्यार जिस गी इनें गुज्झा, छ्पालियै यानि जिस आस्तै इ’नें बुल्ल बी सी रक्खे दे हे ते ओह् पीड़ें राहें बाह्र आई गेआ:- जोह्दा कदें इज़हार नेईं कीता ऐ,
ऐसा असें प्यार कीता ऐ।
होंठें पर कदें ज़िकर निं आया,
ऐसा असें मूहं सीता ऐ। ( 86 )
इस दे बाद इंदी पीड़ें, उदासी ते वियोग ने इन्दा पिच्छा नेईं छोड़ेआ सगुआं बेल्लें-कबेले आइयै इनेंगी बेचैन गै कीता। संग्रैह दे शीर्शक आह्ली कवता ‘हिरखै दी पीड़’ कवि दे अंदर दी पीड़ बझोंदी ऐ जेह्डा बछोड़े दी मकदी भट्ठी पर से’ई होंदा ऐ उसगी इक-दूए नै एड्डे भिड़ने याद औंदा ते सोचदा जे माह्नू अपने टब्बरै थमां परदेश कि’यां रौंह्दा ऐ उसी ते लगदा जे ओह् अंग-संग गै ऐ:-
कदें कोई भरम होंदा,
मिगी रातीं कोई ज’गा दा।
मेरे कोल-कोल होइयै
कोई गल्ल ऐ सना दा।
जां
एह् हिरखै दी पीड़,
अज्ज किन्नी कम्म आवै दी।
इन्नी दूर बैठे दे बी,
‘कन्नै’ बाज पवै दी। ( 53 )
एह वियोगी दर्द कवि दी मती सारी कविताएँ च लम्बी जाह्ग जि’यां ‘साथी साथ नभाया चंगा’ च कवि अपने साथी कन्नै रोह –रौसा छंडदा लभदा जे ओह ऐसा गेआ मुडियै परतोया नेईं उ’न्न साथ नेईं नभाया ऐं। ओह हर पल उसी ओहदे गै परछामें लभदे न। भरम तेरा परछामां बनिऐ
गल्लां करदा मेरे’ने आनिऐ
हरपल कोल खड़ोती लब्बें,
भरमै ने भरमाया चंगा।
साथी साथ नभाया चंगा। (60 )
कवि दे इस वियोगी गीत च साफ झलकदा ऐ जे एह् अपनी जीवन साथी दी याद च तिल-तिल करियै धुखै दे न जिधर बी जदे न उधर उसी गै दिखदे न किश बी खाने दा मन नेईं करदा उ’दे लाए दे बुह्टे पर फल पैन्छी बगैरा गै खा दे न पर ओह्दा उसगी पता नेईं ऐ जे किश थाहरै पर चली गेदी ऐ:-
तेरे पपीते पक्कै करदे,
ठुंगै करदा बेहियै कां।
नीम्बूयै गी बी बुर प’बै दा
बेह्ड़ै होई झौंगरी छां।
कदें तेरा सिरनामा लब्बै,
चिट्ठी गी उस डाकै पां। ( 78 )
कवि उब्बी समां याद करदे न जे कि’यां उ’न्दा एह् संसार बसेआ हा:-
ओह् दिक्खियै मुस्काई,
अ’ऊं दिक्खियै हस्सेआ।
इ’यां गै साढ़ा,
दौने दा डुग्गर बस्सेआ। ( 88 )
‘भरस्यालै’ कविता च कवि अपने प्रति अग्गै गै सीस नुआने दी गल्ल करदा ऐ ओह ईश्वर अग्गै नतमस्तक होने दी बजाए अपने इश्क अग्गै चुकना चाहन्दा ऐ। कवि एह दुनिया च’ऊं दिने दा मेला आखिये इत्थुआं चलने दी गल्ल करदा ऐ जे बत्थेहरा साथ नभाई छोड़ी मंदर – मसीतां सारीं,
तेरी गैली फेरे पागे।
रब्ब खड़ोता बिट–बिट दिक्खै,
तेरे अग्गें सीस नुआगे। ( 67 )
ते कवि फ्ही इब्बी आक्खियै सबर करी लैंदा ऐ:-
एह जीवन दुख, दरद कसाले,
हरपल पिने जैहर प्याले। ( 56 )
इ'नें गी लगदा ऐ जे हून हिरख-प्यार च बी छड़ा नाच-त्रप्पा गै रे'ई गेदा ऐ। ओह् जेह्डा हिरख पैह्ले आशिक नभांदे हे ओह् नेईं ऐ।
हून ओह् रिश्ते नेईं रेह्,
जि'नें गी नभांदे हे आंशिक,
लैला दा मजनूँ सच्चे-मुच्चें
हून बगान्ना होई गेआ ऐ। ( 87 )
‘में कोई कवि नेईं’ च कवि पूरी चाल्ली कन्नै समाज थमां खिंझे दा लभदा ऐ ओह्दे अंदर इक दुखन ऐ जिस करी ओह्दी कलम कोई झूठी प्रशंसा नेईं करी सकै दी ओह बी इक आम माहनु आहला लेखा गै मसूस करा दा ऐ। ओह उ’नें कवियें थमां अपने आपै गी बक्खरा मित्थदे होई कवि मनने गी तैयार नेईं ऐ। कवि आक्खदा ऐ :-
में नमीं कवता दा अनुरागी,
मानव नमीं व्यवस्था दा।
अपनै अंदर मसूस करां,
हर माह्नू दी व्यथा दा।
कि’यां रवां में तेरै गोचर,
में कोई रवि नेईं।
में कोई कवि नेईं। ( 33 )
दानपुरी हुंदिया मतियां कवतां समाजवाद थमां प्रभावित न जिस च एह् सभनें लेई इकै जनेह अधिकार ते वर्गहीन समाज दी मंशा करदे न। सरमायादारें दे विरोध च खडोइयै सुत्ती दी लुकाई गी अग्गै आने आस्तै ललकारदे न। कीजे गरीब ते शरीफ दी अज्ज कोई नेईं पुच्छदा इसकरी हिम्मत करियै गै अपने हक्क प्राप्त करने पौंदे न। इब्बी सुआल करदे न:-
कुत्थें वर्गहीन समाज ते
समाजवाद दे नाहरे ।
हर माह्नू गी रूट्टी-टल्ला,
ते कोठे दे लारे।
एह्दी हिक्खी-हिक्खी साढ़ी
कुल्ली होई परानी।
उट्ठो हुन किश होश करो,
सिरै च पाओ पानी। ( 42 )
इ’यां अज्ज सरमायादार वर्ग साढ़ा गै हक्क खाई जा दा ऐ ते जनता गी महजब दे नां उप्पर लड़ाई जा दे न, खून-खराबा, उग्रवाद सब इंदियां गै चालां न, हुन ओह् बेल्ला आई गेआ ऐ जिसलै असें इन्दा साथ नेईं देना।
हर खेतर च हिस्सेदारी,
गरीबें दी बी होग।
सरमायादार बी ‘देग’ छोड़ियै
साढ़े कन्नै बौह्ग।
कदुं रुकना एह शोशन साढ़ा,
ऊँच-नीच कदुं जानी।
उट्ठो हुन किश होश करो,
सिरै च पाओ पानी। ( 42-43 )
‘मेरे मूल अधिकार’ कवता च दानपुरी होर लोकें दे मूल अधिकार वापस चांह्दे न कीजे इस सफ़ेदपोश सभ्यता ने सगुआं मता गै नंगा नाच नचाया ऐ। जि'यां-जि'यां सभ्यता दा विकास होआ उ'न्न आम-लुकाई गी समाजी भाई-चारे थमां दूर गै कीता ऐ। जिसकरी हर इक माहनू दूए गी लुट्टै दा ऐ। बशक्क पैह्ले माहनू जंगलै च रौंह्दा हा पर आपूं चें उंदा भाईचारा हा कोई जात-पात नेईं ही बल्के जि'यां-जि'यां सभ्यता समें कन्नै सभ्यता बदली माहनू नै करूप रूप धारण करी लेआ ऐ जिसकरी कवि वापस उस समें च जाना चांह्दा जिस च सकून हा:-
समाज तुसें हा बनाया,
रौह्ना माहनू गी सखाया।
सुख-दुख सारे बंडो,
हत्थ, हत्थै कन्नै गंडो।
पर तुसें बाँह मरोड़ी,
रत्त लिस्से दी नचोड़ी।
सारा समाज लुट्टी खाद्दा,
रक्खी कोई निं मरजादा।
मिगी जंगलै आहले सारे संस्कार दित्ते जान।।
मिगी मेरे मूल अधिकार दित्ते जान।। ( 36-37 )
समाजवाद ते मजदूर नां दी कवताएँ च कवि ने समाजवाद पर करारी चोट कराई दी ऐ जे जित्थै समाजवाद च सभनें गी इक्को-जनेह अधिकार मिलने चाहिदे न उत्थै गै लोकें गी उन्दे हक्क नेईं मिलने करी ओह अजें बी खस्ता हालत च गै अपना जीवन-जापन करै दे न। समाजवाद दे हिमायती नेता छड़े भाशन गै दिंदे न। लोकें गी भलकेरने आस्तै। मजदूर दे बगैर कोई होर इन्ना मजबूर बी नेईं ऐ जिसी समाज दे सरमायदार लोक सतान। जि’यां कवि आक्खदा:-
तुयें ते हैं ऐं,
जिस्सी सब सतांदे न।
* * * * *
एहदे च मेरा कसूर नेईं ऐ,
तेरे बगैर जिस्सी सताया जा,
समाजवाद च ऐसा,
कोई मजबूर नेईं ऐ। ( 24 )
तारा दानपुरी होर माहनू दी बंडोबंडी थमां बड़े गै दुखी लभदे न जे इन सब किश गै बंडी टकाया धरत-शमान जिस कन्नै कुदरत दी कुसै बी चीज़ दा एहसास नेई होंदा जे ऐ उस कुदरत दी दित्ती ऐ ते कवि माहनू अग्गै अरज करदा ऐ जे इश्क बगैर जी लेंङ पर तुस इ’नें नियामतें दी बंडो – बंडी नेई करो:-
हकीकत दा ,
कोई ते खास रेह्न देओ।
जी लैंङ वगैर इश्क दे, कयामत तकर,
बस तुस जीने दी इक आस रैह्न देओ। ( 74 )
माहनू जेहड़ा तेरी मेरी दी बंदिशे च बनोए दा ऐ कवि इस थमां बी बड़ा गै दुखी ऐ जे सब किश बंदिशें च रखी लेदा ऐ फिरके, नस्ला, शक्ला, रवाज, रीतां, मंदर – मसीतां, धरत इस च बज्झी गेदे आं तेरी – मेरी दे घेरे-बंदियां बनाई लेदियां न जद् तगर एह बंदिशा खुलदियां नेई तद् तगर सौक्खा साह् नेई आई सकदा। इ’यै गल्ल कवि कविता ‘एह् घेरे कनेह्’ च करदा ऐ । जि’यां:-
एह् नफरत दे बद्दल चार-चफेरे कनेह्?
एह् बंदिशां कनेहियाँ, एह् घेरे कनेह्?
त्रोड़ एह् घेरे ते बंदिशां खोह्ल्ल,
छोड़ एह् नफरत, बोल हिरखै दे बोल
सांझी धरती सांझे बसीले
बंडिए खाई लैओ जो किज कोल
एह् मेरे कनेह्, एह तेरे कनेह्?
एह् बंदिशां कनेहियाँ, एह् घेरे कनेह्? ( 77 )
कवि इक थाहर ‘रूट्टी बग़ैर आज़ादी’ कविता च उ'नें लोकें गी शारें-शारें च गल्ल छुआई जंदे ऐ जेह्ड़े छड़ी अजादी दी गल्ल करियै लोकें गी बुद्धू बनांदे आवै दे न कवि आखदा ऐ जेकर रूट्टी खाने गी नेईं होग ते अस अजादी दी गल्ल करगे तां ओह् बेमैह्नें ऐ। कीजे अज्ज बी लोक सरमायादार लोकें दे ग़ुलाम गै न:-
अज़ादी अधूरी ऐ, वगैर अर्थ दे,
अज़ादी अधूरी ऐ, वगैर अर्थ दे,
अर्थ वगैर अज़ादी दा किश अर्थ नेईं।
अज़ादी च हक नेईं थ्होन अगर,
आंदोलन जां क्रांति कोई अनर्थ नेईं। ( 82 )
‘चंगा नेई लगदा’ कवता च कवि आलसी नकम्में लोकें गी सन्देश दिंदा ऐ जे कीरने करने कन्नै किश नेई बनदा ऐ जेकर किश बनना ऐ तां उस आस्तै हिम्मत बी करनी पौंदी ऐ:-
ख़ून देई सकदे ओ ते मेरे कन्नै टुरी पवौ,
एह् ठंडा पसीना मिगी चंगा नेईं लगदा।
हिम्मत है ते सिरै पर कफ़न बन्नी लैओ,
रोज-रोज़ कफन सीना मिगी चंगा नेईं लगदा। ( 80 )
‘एह् साढ़ा देस ऐ’ कविता च आक्खदे न जेकर अस मेरा-तेरा नेईं करगे जिसलै सांझी गल्ल करगे तां गै देस बी अग्गै बद्धी सकता ऐ। कवि इस समाज च धर्म दे ठेकेदारों थमां बड़ा दुखी ऐ जिनें बक्ख-बक्ख खुदा बनाई लैंदे न पर केईं अपने चेहरे पर मरक्खे लाइयै उस खुदा ते आम लुकाई गी लुट्टी जा 'दे न:-
केइयें अपने चेहरे पर मरहक्खे सजाई ले,
ते में परेशान होई गेआ दिक्खियै इन्ने खुदा.....।। ( 84 )
कवि माह्नू दी आपराजी थमां बड़ा दुखी लगदा ऐ कीजे इन्नै शुरू थमां गै मनमानी कीती ऐ कदें बी समझाए दे रस्ते पर नेईं चलेआ। इ’न्न गांधी दे आत्म नियंत्रण जां मार्क्स दे सामाजिक नियंत्रण गी बी नेईं मनेआ।
मन गी वश च रक्खना बड़ा ज़रूरी ऐ
अनुशासित समाज दी इ'यै धूरी ऐ। ( 85 )
कवि आक्खदा ऐ जे धर्म हून अपनी परिभाशा गै बदली बैठे दा, धर्म कोला हून डर लगना शुरू होई गेंदा ऐ जिस च आदमी आदमी दा गै दुश्मन ऐ जिस च आदमी आदमी गी मारा दा ऐ ओह् कैसा धर्म ऐ, धर्म ते ओह् होना चाहिदा ऐ जे आदमी गी बना ते सखा।
ओह् धर्म केह् जेह्डा मरना-मारना सखा।
धरम ते ओह् ऐ, जेह्डा आदमी गी आदमी बना। ( 81 )
कवि गी कोई लुब्भ लालच नेईं ऐ ओह इस देसै गी सुरग बनाना चान्ह्दा ऐ ओह्दी इच्छा ऐ जे इस धरती पर कोई भागीरथ आवै जेह्डा अपने तप कन्नै इस जुल्म-भ्रश्टाचार दा नाश करियै सुक्खै आह्ली ब्हा झोलै:-
ना मुक्ति दा लालच मिगी,
ना सुरगै दा लुब्भ।
में चान्ह्ना कोई भागीरथ,
इस धरती गी बना । ( 59 )
‘मिट्टी’ नां दी कवता च कवि ने माहनू दे मिट्टी होई जाने दी सार सुझाई दी ऐ बशक्क जिन्ना मर्ज़ी मैं-मैं करदे रौह्गे ख़ीरी इक दिन मिट्टी' नै मिट्टी गै होई जाना ऐ।
मिट्टी काली, मिट्टी चिट्ठी,
मिट्टी दे केंई रंग।
इक दिन सारें मिट्टी होना,
इस मिट्टी दे संग। ( 39 )
कवि ‘इक सुआल’ कवता च पुच्छना चान्ह्दा ऐ जे इक समां आना असें दुनिया च नेईं होना उसलै सभनें अक्खियें चा अत्थरुं केरने न पर कुसै गी नेईं पता जे माह्नू कुत्थै जंदा ऐ एह् सुरग-नरक केह् उस ईश्वर ने माह्नू केह् बनाए दा ऐ जेह्डा आनियै लग्गियाँ-फब्बियां करदा ऐ जे इत्थै कर्में दा फल्ल भोगने आस्तै आंदा ऐ तां एह् जनम-मरण दे चक्रें थमां मुक्त की नेईं होंदा ओह इत्थुं तगर आक्खी जांदा ऐ जेकर इ’नें सुआलें दा जबाब नेईं ऐ तां उसगी लाह्म्बू बी नेईं लाया जा:- मिगी एहका सच्च दस्सो हां,
हून मिगी तुस नेईं टलपाएओ।
जेकर तुसें सच्च निं दस्सना,
तां मिगी नेईं लाह्म्बू लाएओ। ( 46 )
कवि अपनी भाशा प्रति बी बड़ा फिक्रमंद ऐ जे अपनी माँ बोल्ली गी लोक भुलदे जा दे न ओह् बोल्ली जेह्डी पैह्लो-पैहल ञ्यानें दे कन्न च पौंदी ऐ ते जिस कन्नै सारियां सैनतां सिखदा, जिस बोल्ली कन्नै अपनी पंछान ऐ। जेह्डी तेरी रग-रग च ऐ इस करी इ’या शैल ऐ:-
मान कर माऊ दा तूं,
माँ-बोल्ली आखदी।
भाशा दा गुमान कर,
मुहं खोह्ल्ली आखदी,
अपनी माँ-बोल्ली बिना
हर माह्नू ज’ल्ला ऐ।
होए चतर-चनार भमें,
फ्ही बी ओह् बलला ऐ,
मात्तरेआ दे आक्खै लग्गी,
मां गी निं रोल।
डोगरी ऐ बोल्ली साढ़ी,
डोगरी गै बोल। ( 41 )
कवि सिर्फ़ इश्क़-मुहब्बत दी गै गल्ल नेईं करदा उ’न्न ईश्वर भक्ति दी बी गल्ल कीती दी ऐ जे मना तूं हून इक पास्सै होई जां उस ईश्वर दी राह पर चल, इस दुनिया दे मोह थमां छुटकारा लेई लै। जि’न्ना मर्ज़ी डिंगा- त्रेह्डा हो पर उस परमात्मा आह्ली बक्खी लग्गी जा। एह् संसार कमल आह्ला लेखा सोह्ना जेह्डा अपनी बक्खी खिच्ची लैंदा ऐ पर तूं अपने आपै गी इस बक्खी दा उस परमेश्वर आहली बक्खी लेई जा । कवि माह्नू दी मूर्खता पर चबात बुझदा ऐ जे परमात्मा साढ़े अंदर ऐ ते अस सारी उमर उसी दर-दर तुप्पदे रौह्ने आं।
मुंढै हेठ हजूर बैठे दे,
तुस चढ़ी खजूर बैठे दे।
कि’यां मेल होयै तुंदा,
कोल होइयै बी तुस दूर बैठे दे। ( 91 )
अपने इस पेपर गी विराम दिंदे होई एह आखना चांह्ग जे इस संग्रैह दियां सब्भै कवितां मन चित्त लगने आह्लियाँ न । कवि ने जेकिश इस संसार च दिक्खेआ-भलेआ, भोगेआ ओहदा एहसास उ’नें कविताएं राहें पाठकें गी करोआया ऐ। इंदी कविताएँ च जित्थें हिरख बछोड़े न उत्थै समाज कल्याण दी फिकर बी ऐ। इस संग्रैह दा डोगरी साहित्य च बड़ा निग्गा सुआगत ऐ।
-----------------
