डोगरी कविता च बरखा (डॉ. चंचल भसीन)
कविता दा सिद्धा सरबंध मनै च उसरने आह्ले कोमल भावें कन्नै ऐ, जेह्ड़े माहनु दे मनै च आप-मुहारे पनपदे न। एह् जीवन दी गै प्रतिक्रिया होंदी ऐ। पर एह् प्रतिक्रिया दमागी तर्क दलीलें राहें नेईं होंदी बल्कें एह्दा सरबंध मनुक्खें दियें सूखम सोच-भावनाएं कन्नै ऐ। कविता दा रूप-सरूप छड़ा ओह्दे लय-ताल जां भाशा दी रोचकता च गै नेईं होंदा। कविता दा मकसद बी होंदा ऐ ते कविता शब्दें दी मनें गी छूह्नें आहली रचना ऐ जेह्ड़ी सचाई गी साढ़े सामनै उ’यां गै गुहाड़दी ऐ जि’यां कोई चित्रकार रंगें कन्नै साढ़े सामनै इक चित्र खड़ेरी दिंदा ऐ। जेकर गल्ल कीती जा डोगरी कविता दी तां हिंदी आहला लेखा डोगरी दा आदिकालीन साहित्य बी कविता थमां गै शुरू होए दा ऐ। डोगरी कविता दा एह् सफर निरंतर गति कन्नै चलदा आवै दा ऐ। ते अज्जै तगर कोई ऐसा विशे नेईं ऐ जिस च डोगरी दे कवियें अपनी कलम नेईं चलाई। भामें ओह् गल्ल करचै मुंढ़ले कवियें दी जां आधुनिक कवियें दी। डोगरी कविता इक नदी आंगर लगातार बगदी जा’रदी ऐ। जेकर गल्ल करचै डोगरी कविता च बरखा दी तां एह् विशे बी कवियें दी कान्नी थमां बचे दा नेईं ऐ।
बरखा दा नां लैंदे गै मनै च ख़ुशी दी लैह्र आई जन्दी ऐ। हर इक जीव-जैन्तु दे मुहां उप्पर रौनक नजर औंदी ऐ, गर्मी कन्नै जेह्ड़ी पैह्लै हर इक शैह् बेहाल होई दी अम्बरै आह्ली बक्खी दिक्खै दी होंदी ऐ ते बरखा दियां एह् ठंडियां- ठंडियां फुहारां पौन्दियाँ न तां धरती दा नजारा गै दिक्खने आह्ला होई जंदा ऐ, शमानै उप्पर बद्दलें दी गड़गज्झ कन्नै, काले-काले बद्दल इक नमां गै रूप लेइयै औंदे न। चबक्खै सैले खब्बलें दे बछैन विछी जंदे न। ओह् खुबसूरत नजारा दिक्खियै कवि दा मन बी विचलित होई जन्दा ऐ। किशन स्मैलपुरी हुंदी कविता इस गल्लें दी नशानदेही करदी ऐ:-
ओह बरखा दी रानी आई, ओह बरसात सुहानी आई,
बद्दल घनोते, काले-काले
पृथ्वी जल-थल करने आहले,
धारां-धारां मस्ती छाई,
ओह बरखा दी रानी आई......
सैली धरत ते सैल्ले बुह्टें,
झडियें मिट्ठी रिम-झिम लाई,
ओह बरखा दी रानी आई..........
डिग्गल गरजे बिजली मिलकी,
रोई बजोगन बिजली-बिजली,
सज्जन शैहर ते आपूं जाई,
ओह बरखा दी रानी आई............
कवि इक होर रचना च बरखा दा वर्णन करदे होई आक्खदे न जे डिड्डुयें दे घर मौजां होई जन्दियाँ न, मोर बागें च पालां पान लगदे न, पिंघां पेई जन्दियाँ न, पपीहे राग मल्हार गान लगदे न, जेह्ड़े कुप्पड़ गर्मी कन्नै भरड़ोई गेदे हे उब्बी ठंडोई गे न:- जि’यां
रुत्त बरखा दी आई चैन्चलो,
रुत्त बरखा दी आई,
बिजली मिलकी धूड़ां छाइयां,
झड़ियें मौज बनाई, चैन्चलो,
रुत्त बरखा दी आई...........
डिड्डुयें घरें, बधाइयां आइयां,
मोरें पालां पाइयां
तरी पेई मरगाई चैन्चलो,
नारें रेशमी पींघां पाइयां +++++++++++++++++++ घर-घर रौनक छाई, चैन्चलो,
रुत्त बरखा दी आई.........
मस्त पपीहे गान मल्हारा,
नारें छोडियै सब्भै कारां
रलियै मौज मनाई, चैन्चलो,
रुत्त बरखा दी आई.........
भखे दे कुप्पड़ फ्हरी ठंडोए,
ठंड कालजै पाई, चैन्चलो,
रुत्त बरखा दी आई.........।
डोगरी दे कवि रतन भारद्वाज होरें बी अपनी इक रचना च सौन म्हीने औने आह्ले बद्दल, कुदरती नजारें दा खूबसूरत चित्रण कीते दा ऐ जे काले बद्दले गी दिक्खदे गै मोर कियां पालां पान लगी पौंदे न:-
धारें-धारें धूड़ां छाइयां
गासै बद्दल छाई गेआ,
पालां पांदे मोर न बागें
सौन म्हीना आई गेआ,
धारें-धारें धूड़ां छाइयां.............
रूप छैलपा मैह्क खलारै,
पेई गेइयां न पीन्ह्गां सारै,
शदिक्खी नारां बनी धनियां चन्न बी शरमाई गेआ,
पालां पांदे मोर न बागें.............
बूदें-बुँदे पौन फुहारां,
मनें च उग्गी पेइयां ठारां,
फर-फर करदा ब्हाऊ दा
झोंका ठंड कालजै पाई गेआ,
पालां पांदे मोर न बागें...............
भौरे अपने भाग सराह्न्दे,
फुल्लें गी दिक्खी गुन-गनांदे,
रंग-बरंगी तितलियाँ दिक्खी
मन मेरा भरमाई गेआ।
पालां पांदे मोर न बागें..................
टटुए दे फुल्ल कविता संगैह दी कविता ‘बरखा दी रुत्त’ दे कवि विजय शर्मा होर बरखा दा बखान करदे होई आक्खदे न जे बद्दलें कन्नै गास घटोई गेआ ऐ जिस कन्नै चबक्खै ठंडी-ठंडी बाऊ दे फनाके चलन लगी पौंदे न। चबक्खै मस्ती छाई जन्दी ऐ। गर्मी कारण भुब्बल उट्ठी दी ही बरखा करी उब्बी नचिल्ली होइयै बेई जन्दी ऐ, गर्मी ने जेह्डा जोर थम्मे दा हा उब्बी घटी गेआ ऐ:-
बद्दलें कन्नै गास घटोआ,
काली न्हेरी छाई
ठंडे-ठंडे चलन फंडूके,
रुत्त बरखा दी आई।
धारें बिच्चा नाडू छुड़कन,
रंग-बरंगे पैन्छी गुड़कन,
बेल्लीं-बुह्टें जाड़ें फुल्लन,
सूटें दे मुहँ भरियै डुल्लन,
सखियें रलियै मिलियै दिक्खो,
पीन्ह्ग लोआरै लाई।
बद्दलें कन्नै गास घटोआ,
काली न्हेरी छाई,
मस्ती कन्नै झुल्लन झौंगर,
थाहरें-थाहरें फुट्टी पौंगर,
ठंडी-ठंडी पौन फुहारां,
धुड़-मधूड़ी लब्भन धारां,
जाड़ें अंदर मोर कूकदे,
पाहल सुहामी पाई,
बद्दलें कन्नै गास घटोआ,
काली न्हेरी छाई।
नदियें नालें चढ़ी जुआनी,
चलती दे गल्ल सोभै गान्नी,
धन्न मालका तेरी माया,
स्रिश्टी अंदर खेल रचाया,
कण-कण अंदर जल-थल कीता,
ठंड कालजै पाई,
बद्दलें कन्नै गास घटोआ,
काली न्हेरी छाई.........
कवि छड़ी बरखा कन्नै होने खुशहाली दा बखान गै नेईं करदा बल्कें ओह् उस कन्नै होने आहली तबाही बारै बी फिक्रमंद ऐ जे बरखा केई गरीबें लेई काल बनियै बी औंदी ऐ, विजय शर्मा हुंदी गै दुई कविता:-
बद्दलें कन्नै गास घटोआ ,
काली न्हेरी छाई,
ढलेआ सौन गरीबें गित्तै,
काल नशानी आई,
बद्दल बटांदा भेष बझोंदा,
यमदुतें दा फेरा,
बिजली दे मलकारें कन्नै ,
पलें च पांदे घेरा,
इंद्र जी खुशियें नै नचन,
करदे जाह्न तबाही,
ढलेआ सौन गरीबें गित्तै,
काल नशानी आई,
मते चिरै दी होआ दी ही
गर्मी नै जिंद कोला,
बे-क्यास ब’रेआ ऐसा,
कोठू होई गे खोला,
अगले सालै तोह्ड़ी भलेआ,
गेआ ई सैन्ख बजाई,
ढलेआ सौन गरीबें गित्तै,
काल नशानी आई,
दिक्खो ध्याड़ीदार बेचारे,
होई गे सारे बेह्ले,
बिच्च नालियें गोते खंदे,
जाहन संतरें केले,
फ’ड़ियें आह्ले आक्खन सब्जी,
मुफ्त गै लेई जाओ भाई,
ढलेआ सौन गरीबें गित्तै,
काल नशानी आई,
अम्बर दिक्खी सहारा होंदा,
बदल दना किश फटेआ,
अंदर दिक्खी ढिड्ड फ़कोआ,
त्रिप त्रिप नेईं हटेआ,
अंदर बरखा, बेह्ड़े निम्बल,
कैसी पेई ऊ फाही,
ढलेआ सौन गरीबें गित्तै,
काल नशानी आई।
डोगरी दी प्रसिद्ध कवित्री श्रीमती विजया ठाकुर होरें बी अपनी कविता च बरखा दा बड़ा सुहामा वर्णन कीते दा ऐ, जे बरखा दी इक-इक बूंद माहनु आस्तै सलक्खनी, ते आस बनियै औंदी ऐ, कविता दिक्खो:-
सैल्ले परवत दब्बड़-जाड
करदी बरखा दी हर धार,
छर-छर बगदे नदियें नालें
कीता धरती दा शंगार,.
रौनक लगी थाह्रो - थाह्र
आई ऐ बरखा आह् ली ब्हार।
निमते होई गे रुक्ख ते बूह्टे
बेलें पर फुल्ल खंदे झूटे,
छैह् - छैह् मिट्ठे नाड़ू बगदे
डाह्डी मस्ती मनै च भरदे,
त'वी बझोंदी प्रेम दीवानी
अशकै अल्लढ़- जन मुटेयार,.....
रौनक लग्गी थाह् रो थाह् र
आई ऐ बरखा आह् ली ब्हार।।
लैह् री - लैह् री बरखा बरदी
खेत्तर- खुम्बे सुच्चे करदी,
इक -इक पत्तर चु"म्दा गास
बूँदें भ"रिये हिरख सगात
जि"या अम्मा हिक्कड़ू लाइयै
करदी बच्चड़ुयें गी प्यार,......
रौनक लग्गी थाह् रो थाह् र
आई ऐ बरखा आह् ली ब्हार।
इक - इक बूंद सलक्खनी आई
सभनें दे मन आस जगाई,
सज्जी नारां थाल सजान
भांत- सभांते दे पकवान,
रसदा - बसदा र'वै एह् म्हेशा
साढ़ा सुख भरेआ संसार,
रौनक लग्गी थाह् रो थाह् र
आई ऐ बरखा आह् ली ब्हार।।
बिशन सिंह दर्दी होरें बी बरखा दा वर्णन अपनी इक कविता च इस चाल्ली कीते दा ऐ जे जिसलै बरखा औंदी ऐ तां केईयें दे कच्चे घर कोठू चौन लगी पौंदे न, कविता इस चाल्ली ऐ:-
कच्चे कोठे टपरे चौन,.
कंधां कोट बनेरे ढ़ौन,
झड़ियां लाई-लाई ब’रदा सौन,
सारै जलथल करदा सौन,
कुडियैं-चिड़ियैं हिरख प्यार,
राड़ें दी हुन मुक्की ब्हार,
होई सैलतन थाहरो-थाहर,
तिल, मांह, मुंगी कन्नै जोआर,
भिन्डी, भट्ठे मर्च करेले,
थां थां मस्ती छाई गेई बेलैं,
घ्यो कंडोलियां, कद्दूं अल्लां,
छान चबक्खै पांदियाँ मल्लां,
पानो-पानी करन चफेरै,
टप-टप करदियाँ बूंदां पौन,
झड़ियां लाई-लाई ब’रदा सौन, सारै जलथल करदा।
कृष्णा मगोत्रा होरें अपनी कविता च बरखा दा जिकर खुशहाली दे तौरै उप्पर कीते दा ऐ जे इस मौसम च जित्थै माहनु ख़ुशी कन्नै पसोई-पसोई पौंदा ऐ, उत्थै गै पैन्छी-पक्खेरू बी गीत गान लगी पौंदे न:--
सौन दा म्हीना ते रित्त खुशहाली,
निक्की-निक्की बरखा ते छाई हरेआली,
होर पखेरू गांदे गीत ब्हारी,
तोता ते मैना गांदे अपनी कब्बाली मस्ती गै मस्ती चौह्नें पासें छाई दी, चादर लपेटी लेई अंबरै ने काली,
सौन दा म्हीना ते रित्त खुशहाली............
जिन्दे कैंत परदेशी न उंदी नारें लेई बरखा, काले बदल उदासी दा प्रतीक बनियै आई जंदे न, डोगरी दे मन्ने-परमन्ने दे कवि तारा दानपुरी होर लिखदे न:-
कालें बद्दलें न्हेरा पाया,
अज्ज फ्ही तेरा चेता आया,
रुनकु’न रुनकु’न बरदी बरखा,
अक्खियें कोसा नीर र’लाया,
सतरंगी पीन्ह्गै पर बेहियै,
सज्जन असेंगी मिलनै आया,
तेरे बाजू जीना मुश्कल,
कु’न जानै एह् दुःख पराया।
इ’यां गै सीता राम सपोलिया हुंदी कविता ऐ जिस च इ’नें वर्णन कीते दा ऐ जे जिन्दे कैंत परदेश न ते ओह नारां किस हाले जिन्दियाँ न, कविता इस चाल्ली ऐ:-
सौन सुहामा ई गरजै-गड़कै,
निक्कियां-निक्कियां नै पौन फुहारां,
कैंत नै जिन्दे नित्त परदेसी,।
केह करी हिले बो जिंदियाँ,
गीत मिलन दे न गांदियाँ कोयलां,
आई गेइयाँ फ्ही हिरखी नै ब्हारां
सज्जनें बाह्ज जग ऐ बरान्ना,
कु’न बुज्झै अज्ज दिल दियां सारां।
इंदी गै इक होर कविता दियां सतरां:-
रिम-झिम, रिम-झिम बरसै बदली,
मन इक्कला दुखिया कलपांदा,
मेरी नै छातिया ङार बलै दे,
नेईं कोई अपना जो म’लमां लांदा।
खीरै च एह् आक्खना चाह्ग जे डोगरी कविता च बी बरखा दा वर्णन बखूबी कन्नै होए दा ऐ। --------------------
(डॉ. चंचल भसीन)
