"लीकरां" ( डॉ. चंचल भसीन )

    "लीकरां"

शीशा दिक्खी त्राह-जन लगेआ

शीशे इचा झांकदी ओह हस्सी ते बोली

में तेरा उ’यै मुहांदरा आं

जिसी तूं हर बेल्लै बड़ा सुआरी बनाइयै रखदी ही।

इन्न बी तेरा साथ नेईं दित्ता

इब्बी शक्ल बदली ऐठा .....

में तड़फी उट्ठी

नेईं नेईं

एह् नेईं होई सकदा

बिलकुल नेईं होई सकदा

एह झुर्रियां,

एह् लम्मी-लम्मियां

लीकरां !

ओह हस्सी

एह लीकरां परेशानियें दियां नेईं

तजर्बे दियां न

तेरी उमरा दी कमाई न, 

वरासत ऐ

जिसी हर ब’रा जंदे-जंदे तुगी सौंपी गेआ ऐ।

शशोपंज इच पेई दी में पुच्छेआ  

जेकर तजर्बे दियां न 

एह लीकरां

तां कीऽ एहदा कोई गाहकी नेईं

कोल नेईं ढुकदा

दूर-दूर कीऽ नस्सदे न सब ?

चढ़दी बरेसा ते

च'ऊं बाह्में दी लोड़ ऐ

पर लड़ छड़कांदे न सब

मेरे तजरबे दिएं लीकरें दी कुसी लोड़ ऐ ?  

शीशे इचा ओह् फ्ही हस्सी

इसी विडंबना गै समझ

कोई दुए दे तजरबे दियें लीकरें गी पसंद नेईं करदा

सब्भै अपना तजरबा आपूं कमाना चाहंदे न।  

            ( डॉ. चंचल भसीन )