चेत्तर नराते दा सांस्कृतिक म्हत्व ( डॉ. चंचल भसीन )

                                        चेत्तर नराते दा सांस्कृतिक म्हत्व
                                                          डॉ. चंचल भसीन
डुग्गर धरती रिशियेँ-मुनियेँ दी धरती जित्थै हर धर्म दे देवी-देवता बास करदे न। इत्थै थांह्-थांह् पर धार्मक स्थल न। इस थाह्‍र पर हिँदुएं दी अबादी मती होने करी चप्पे-चप्पे पर मंदर मिलदे न जिसकरी इस धरती गी मंदरेँ आह्ला शैह्‍र बी आक्खदे न। खास करी इत्थै बाह्बे आह्ली माता ते त्रिकुटा प्हाडियेँ च बास करने आह्ली बैष्णो माता ऎ। जिँदी चमत्कारी मैह्मा कारण पूरा ब'रा श्रदालुएं दा आना-जाना लग्गेआ रौँह्दा ऎ। दूरै-दूरै थमां लोक अपनी मनेँ दियां मुरादां पाने आस्तै औँदे न ते इंदे आर्शीवाद कन्नै खुशहाल जीवन व्यतीत करदे न। जिनेँ दिनेँ इत्थै मती चैह्ल-पैह्ल होँदी ऎ ओह् न माता दे नराते जिसलै चबक्खै रौनकां गै रौनकां लब्भदियां न। बाजार सज्जी जंदे न।
नराते दी जित्थै गल्ल ऎ इंदा अपना खास म्हत्व ऎ। ऊ'आं ते नराते ब'रे च चार बारी औँदे न। पर द'ऊं नराते चेत्तर ते अस्सूं आह्ले दा गै मता म्हत्व ऎ। इंदा बी एक विज्ञानक कारण ऎ जे मौसम विज्ञान मूजब दो म्हीने सोए ते स्यालै कारण म्हत्वपूर्ण मन्ने जंदे न। दिक्खेआ जा ते रूतां बी छे (6) मन्नी जंदियां न पर प्रमुख द'ऊं गै न। इ'यां गै नराते बी द'ऊं गुप्त न जि'न्दा कोई इ'न्ना म्हत्व नेईँ मनेआ जंदा ऎ।
स्यालै दी शुरुआत अस्सूं म्हीने थमां ते सोए दी चेत्तर म्हीने थमां मन्नी जंदी ऎ। जि'यां गै मौसम बदलोन लगदा ऎ तां पूरे भौतक जगत च हलचल होना शुरु होई जंदी ऎ।रुक्ख-बूह्टे, जल ते पूरा वायुमंडल तगर सभनेँ च तबदीली होन लगी पौँदी ऎ। माह्नू सेहत पर बी खासा असर पौँदा ऎ।चेत्तर म्हीने थमां सोआ शुरु होने कन्नै माह्नू शरीरै च पिछलेँ केँई म्हीनेँ दे लहुऎ दी गति जेह्डी घट्ट होई दी होँदी ऎ ओह् नाडियेँ च त्रिक्खी द्रौडन लगी पौँदी ऎ। सिर्फ रक्त दी गै गल्ल नेईं बल्के पूरे शरीरै दी गतिविधि गै बदली जंदी ऎ। इत्थूं तगर जे मूहां दे स्वाद मौसमै दे स्हावै कन्नै बदलोई जंदे न। इ'यै कारण ऎ जे संसारै दे ज्यादातर रोगी इ'नेँ म्हीनेँ च जां ते जल्दी नरोए होई जंदे न जां फ्ही परमात्मा गी प्यारे होई जंदे न। शास्त्रकारेँ बी इ'नेँ म्हीनेँ शरीर गी पूरी चाल्ली कन्नै स्वस्थ रखने आस्तै नौ ध्याडेँ तगर बशेश रुप च वर्त आदि रखने दा विधान दस्से दा ऎ। इस कन्नै इब्बी आक्खेआ जंदा ऎ जे पराने जमाने च फसलां बी द'ऊं गै राईयां जंदियां हियां खरीफ ते रबी।ते नराते बी इ'नेँ फसलेँ दे कोल-कश गै औँदे न। नराते दा अनुश्ठानक म्हत्व इ'ब्बी लगदा ऎ जे नमीँ फसलेँ दा मुंढ कंजकेँ दे हत्थेँ मंगलपूर्वक होई जा ते इसदे कन्नै राह्ने आह्ली फसल दे बींऽ दी परख बी होई जंदी ऎ।चेत्तर म्हीने आह्ले नराते दे बेल्लै खरीफ ते अस्सूं आह्ले नराते दे बेल्लै रबी फसल राही जंदी ऎ। असल च चेत्तर म्हीने आह्ली फसल दा सरबंध बसंत आह्ली फसल कन्नै ऎ।चेत्तर बसंती नराते दा आरम्भ चेत्तर म्हीने दी शुल्क पक्ख कन्नै होँदा ऎ।चेत्तर च औँह्ने आह्ले नराते च अपने कुल देवी-देवताएं दी पूजा दा बी प्रावधान मनेआ जंदा ऎ। अज्ज कल्लै दी खीट्टै पेदी जिँदगी च ज्यादातर लोक कुल कुल देवी-देवताएं गी भुल्लदे जा दे न ते किश समेँ दी कमी कारण बी पूजा पाठ आह्ली बक्खी ध्यान नेईँ दिँदे न।
पुराणे च नरातेँ दा बखान:-
मान्यता अनुसार जे नराते च गै महाशक्ति दी पूजा करियै भगवान श्रीराम चंद्र होरेँ अपनी शक्ति गी परतियै हासल कीता हा। तां करियै बी इस बेल्लै आदि शक्ति दी अराधना उप्पर बिशेश जोर पाया जंदा ऎ। मार्कण्डेय पुराण मताबक दुर्गा सप्तशती च भगवती न इस समेँ च शक्ति पूजा गी महा पूजा दस्से दा ऎ। धर्म ग्रंथेँ मताबक चेत्तर शुल्क पक्ख च भगवान विष्णु ने मत्स्य अवतार लैता हा।इस ध्याडे थमां गै सतयुग दी शुरुआत मन्नी जंदी
ऎ। विक्रमी सवत् दी शुरुआत महर्षि दयानंद आसेआ आर्य समाज दी स्थापना बी चेत्तर म्हीने थमां गै होई। नमां ब'रा बी चेत्तर म्हीनेँ थमां गै होँदा ऎ।जिसलै नराते दी सांस्कृतक म्हत्व दी गल्ल ऎ तां असेँगी अपनी संस्कृति अर्थात उब्बी लोक संस्कृति आह्ली बक्खी जाना पौह्ग। जेह्दे च असेँगी पूरेँ समाजै दी झलक मिलदी ऎ। जेह्दी बिल्कुल सुच्ची, कुसै छल-छलिद्दर थमां बची दी ऎ। अस दिक्खनेआ जे इंदे च नराते दी काफी म्हत्ता दिती गेदी ऎ।लोक गीतेँ च माता दियां भेटां जेह्डियां नरातेँ च साखा रांह्ने थमां लेईयै ते माता दी साखा परबाने तगर दियेँ भेटेँ च पूरी संस्कृति झलकदी ऎ। नराते दा त्योहार साढी संस्कृति च इक त्योहार दे रुपै च मनाया जंदा ऎ जेह्डा महिलाएं दी गरिमा गी दर्शाँदा ऎ। नराते दा त्योहार औँदे गै सब्भै थाह्‍रै पर गैह्‍मा-गैह्‍मी शुरु होई जंदी ऎ। मंदरेँ च रौनकां बद्धी जंदियां न। जि'यां केह् नरातेँ दी शुरुआत घरेँ च साखां (कनक ते जौँ रुप च) रांह्ने दा रवाज ऎ।इस आस्तै कुडियां कुतै साफ-सुथरे थाह्‍रा दी सुच्ची मिट्टी ते रेत च मलाइयै कनक जां जौँ रांह्दियां न। मिट्टी-कोडियेँ कन्नै कंधै पर माता दी मूरती बी बनादियां न ते मिट्टी दे भांडेँ जां जिमीँ पर जित्थै साखा राई जंदी ऎ। उसगी ब्रैह्कड, दरैँक जां इयै जनेह् पत्तरेँ कन्नै खट्टी रखदियां न। जिसलै साख च रूआल-क-औँकरन फुट्टन लगदा ऎ तां उस पर जेह्डा पत्तरेँ दा बत्तर दित्ते दा होँदा ऎ उसगी तोआरेआ जंदा ऎ। ते कुसै पतीले जां डब्बे कन्नै खट्टदियां न। इसगी ओह् माता दा बिम्ब गै समझदियां न। उसगी नमीँ लाल चुन्नी कन्नै खट्टियै उस थाह्‍रै गी माता दा मंदर गै मित्थी लैँदियां न। जिसलै साख रांह्दियां न तां माता दियां भेटां बी गांदियां न। जि'यां:--
आवो भैनोँ साख राह्चै,
साख, राह्चै कन्नै भेट गाचै।
साढै प्हाडेँ आह्ली नै अज्ज औह्ना।।
आवो भैनोँ न्होमन चलचै,
न्होमन चलचै, कन्नै भेट गाचै,
साढै बाह्वे आह्ली नै अज्ज औह्ना,
आवो भैनोँ चूटी करचै,
चूटी करचै, कन्नै भेट गाचै।
साढै लाटां बाली नै अज्ज औह्ना।
इ'यां नराते च कुडियां सिर्फ किट्ठियां होइयै गांदियां गै नेईँ बलके पूरेँ-नराते च माता दी पचैलन बी बनी जंदियां न। इ'नेँ नरातेँ दा सांस्कृतिक म्हत्व इ'ब्बी ऎ जे पूरे ग्रां-म्हल्ले दे लोक किट्ठे होई जंदे न ते सब्भै अपनी-अपनी समर्थै अनुसार पूजा करदे न। कुसै गी कुसै उप्पर कोई रोह्-रोसा नेईं रौँह्दा कीजे कुडियां सभनेँ दे घरै दा माता दी जोत जगाने आस्तै तेल ग्राइयै आनदियां न। इस कन्नै एक भाईचारै दा संदेश बी मिलदा ऎ जे कुसैगी कोई अफसोस नेईँ रौँह्दा जे उ'न्दी कोई हिस्सेदारी नेईँ होई। कुडियां तेल ग्रांह्दे होई एह् गीत गांदियां न:-
तेल पायो पली-पली
पचैलन फिरदी गली-गली।
तेल पायो पा-पा,
पचैलन फिरदी राह्-राह्,
तेल पायो बट्टी-बट्टी
पचैलन फिरदी हट्टी-हट्टी।।
फ्ही इस तेल कन्नै माता दी अखण्‍ड जोत जगाई जंदी ऎ ते एह् जोत पूरे नराते तगर जगदी रौँह्दी ऎ।
रोज नित-निजमै कन्नै कुडियां-जनानियां झुंडियां बनाई-बनाइयै कुसै बगदे पानी न न्हौन जांदियां न ते औँदे-जंदे माता दियां भेटां गांदियां न। इंदे च एक मुक्ख पचैलन होँदी ऎ जेह्डी माता दी सवेरै-सञ्ज'लै आरती करदी ऎ। किट्ठे होइयै सब्भै माता दी आरती गांदियां न:-
गुग्गली दा धूफ धुखै दिन रातीँ
अलसी दा तेल बलै दिन-रातीं।
काएं भरेआ गडबा माता काएं भरी ऎ डोरी,
जमना दा जल राजा भर लेआया चोरी।
जिसलै न्हैरै दा न्होइयै परतोँदियां न तां सुच्चे गडबे च आंदे दे पानी गी साखै गी दिंदियां न ते पूरे निजमै कन्नै माता गी सुती गी जगादियां न ते गांदियां न:--
उट्ठ-उट्ठ माता भित्तडू गोआड
कंजकां आइयां तेरे दोआर।
इ'यां गै एह् सिलसिला रोज चलदा ऎ ते सञ्ज'लै अपने-अपने घरेँ दा रूट्टी लेइयै जिँदे घरै च साख राई दी होँदी ऎ उंदे घर आनियै खंदियां न। इसगी चूटी करना आक्खेआ जंदा ऎ।चूटी करदे बेल्लै सब्भै कुडियां अपनी थाली चा बीर लोँकडे आस्तै किश-न-किश खाने आस्तै रखदियां न। चूटी करने दे परैँत उत्थै गै भांडे बी मांझी लैँदियां न ते फ्ही पूजा आरती करने दे बाद जि'यां बडलै माता गी सुत्ते दे जगादियां न इ'यां
गै सुआलदियां बी हैन ते गीत गांदियां न:-
सौ-सौ माता सुत्तडियेँ,
छैनेँ दी घनघोर ऎ,
सारेँ लोक सेई गे,
पचैलन तेरे कोल ऎ।
लोक इ'नेँ नरातेँ च अपनेँ मनेँ पर काबू रखदे होई पूरे वर्त रखदे न ते किश अपनी सुवधा अनुसार सत्त, पञ्ज, त्रै, इक जिन्ने रक्खी सकदे न ते रखदे न। नरातेँ च हर एक चौक म्हल्ले च रोज कुते-न- कुते माता दा जगराता चलदा ऎ। ते खीरी नराते अश्ठमी. जां नौमनी गी कुडियां काह्न-सखियां बनदियां न ते लोक उ'न्दी पूजा करदे न ते पैहे चढांदे न। जेह्डे साखा अग्गै जां काह्न- सखियेँ अग्गै पैहे होंदे न ते कुडियां आपूं-चे बण्डी लैँदियां न। इस रातीँ कुडियां पूरी रात साखै कोल जगराता करदियां न। अठमीँ जां नौमीँ गी कंजकेँ दी पूजा कीती जंदी ऎ। जिसलै कडाह्-पूरी पकादियां न ते मंगल-कामना करदियां न।
पौराणक कथानुसार प्राचीन काल च दुर्गम नां दे राक्षस ने कडी तपस्या करियै ब्रह्मा जी गी खुश करियै उंदे थमां बरदान हासल करने दे परैँत चारेँ बेदेँ ते पुराणेँ गी अपने कब्जे च करियै कुतै छपाई लेआ। जिस कारण पूरे संसार च धर्म-कर्म बंद होई गे। इस कारण चबक्खै धडथल्ली मची गेई ही। (अ)काल पौन लगी पेआ। रूक्ख-बूह्टे, नदी-नालेँ सब्भै सुक्कन लगी पे हे। जिसकरी जीव-जंतु बी मरन लगी पे। स्रिश्टी गी बचाने आस्तै देवतेँ वर्त रक्खियै नौ ध्याडेँ तगर माँ जगदम्बा दी अराधना कीती ही ते मां अग्गै
स्रिश्टी गी बचाने आस्तै बिनती कीती। तां मां भगवती ने दुर्गम कन्नै युद्ध करियै पापी गी मारी टकाया। तदूं कोला गै दुर्गा दे वर्त शुरू होए।
इ'नेँ नराते च माता दे नौ रुपेँ दी पूजा कीती जंदी ऎ इस करी इ'नेँगी नव दुर्गा आक्खदे न। एह् शक्तियां इस चाल्ली न:--
शैलपुत्री, व्रह्मचारिणी, चंद्रघंटा, कुष्माण्डा, स्कंदमाता, कात्यायिनी, कालरात्री, महागौरी, सिद्धिदात्री।ब
1. शैलपुत्री:- नरातें दी शुरूआत मां शैलपुत्री दी पूजा कन्नै कीती जंदी ऎ। शैल अर्थात प्हाड। पर्वतराज हिमालय दी बेटी पार्वती दे रुप च शैलपुत्री गी मन्नेआ जंदा ऎ। माता दा एह् रुप सखांदा ऎ जे किस चाल्ली मुश्कल परिस्थितियेँ च बी डट्टियै मकाबला कीता जाई सकदा ऎ।
2. व्रह्मचारिणी:- दूए ध्याडे मां व्रह्मचारिणी दी पूजा, ते एह् शक्ति संदेश दिँदी ऎ जे तप शक्ति कन्नै विजय प्राप्त कीती जाई सकदी ऎ।
3. चंद्रघंटा:- त्रिये ध्याडे चंद्रघंटा मां दी आराधना जेह्दी कृपा कन्नै भक्त अपने शत्रु पर जित्त हासल कीती जाई सकदी ऎ।
4. कूष्माण्डा:- चौथे नराते कुष्माण्डा मां जेह्दी उपासना कन्नै समस्त रोगेँ दा नाश होँदा ऎ जिस कन्नै माह्नू दी बरेस, यश, बल आदि दी वृदि होँदी ऎ।
5. स्कंदमाता:- स्कंदमाता दी पूजा पञ्जमेँ रोज इस च एह् संदेश मिलदा ऎ जे बुराइयेँ गी कि'यां नश्ट कीता जा।
6. कात्यायिनी:- छेमे ध्याडे मां कात्यायिनी दी आराधना, एह् सखांदी ऎ जे क्रठन तपस्या कन्नै सुक्ख प्राप्त कीता जाई सकदा ऎ।
7. कालरात्री:- मां दुर्गा दी सतमीँ शक्ति दा नां कालरात्री ऎ। एह् कालरात्री सखांदी ऎ जे मुश्कल घड़ी बी की नेईँ होवै असेँगी बिना कुसै डर त्राह दे व्यतीत करना चाहिदा ऎ।
8. महागौरी:- महागौरी माता संदेश दिँदी ऎ जे वगैर उत्साह दे किश बी प्राप्त नेईं कीता जाई सकदा।इस शक्ति दी उपासना दे बगैर किश बी सम्भव नेईँ ऎ।
9. सिद्धिदात्री:- नौमै ते खीरी रोज सिद्धिदात्री दी उपासना होँदी ऎ। शिव जी इस पूरे व्रह्मांड दे पालनकर्ता न ते मां सिद्धिदात्री उंदे कन्नै इस व्रह्मांड गी चलांदी ऎ।इस करी दुर्गा दा एह् रुप कार्य कुशलता दा संदेश दिँदा ऎ।
इ'नेँ नरातेँ च सब्भै शुभ कम्म कीते जंदे न जि'यां व्याह् कारज, मूनन आदि बी इ'नेँ दिनेँ बगैर कुसै पंडित गी पुच्छे दे सम्पन्न कीते जंदे न। ऊ'आं गै चेत्तर नराते गी सिद्धियेँ आस्तै बी बशेश मन्नेआ जंदा ऎ। इ'नेँ नराते च कीती गेदी पूजा जपतप साधना, जैँत्र सिद्धियेँ आस्तै बडी सिद्ध सावत होंदी ऎ।कीजे इ'नेँ दिनेँ दुर्गा आपूं साक शात विराजमान होँदी ऎ। ते अपने उपासकेँ गी बल दिँदी ऎ। जैँत्र-मैँत्र दियां सब्भै सिद्धियां इस धरती पर सकारात्मक ते नकारात्मक ऊर्जा कन्नै जुडी दियां न ते नरातें च नकारात्मक शक्ति कमजोर होई जंदी ऎ। ऎसा इसकरी कीजे चबक्खै पूजा ते मैँत्रेँ दे उच्चारण कन्नै तैँत्र सिद्धि बडी असानी ते घट्ट समेँ च मिली जंदी ऎ।
इ'यां चेत्तर नरातेँ मनाने दे बक्ख-बक्ख पह्लूएं गी जिसलै दिखने आं ते पता चलदा ऎ जे इ'न्दा साढे जीवनै च बडा म्हत्व ऎ। ओह् पक्ख भामेँ समाजक होवै जां सांस्कृतक माह्नू दे जीवन कन्नै गै जुडे दा ऎ।
------------------------------
Dr. Chanchal Bhasin
Lecturer Dogri