" सेवाधनी-समाजै दा अक्स"
डॉ. चंचल भसीन
कुसै बी साहित्य च उसलै संदोख बुझेआ जंदा ऎ जिसलै उसगी लिखने आहले साहित्यकार समाजै च घटने आह्ली घटनाएं गी विशे बनाइयै कृति दे रूपै च प्रस्तुत करदा ऎ। उसलै समझेआ जंदा ऎ साहित्य रचने दी जिम्मेदारी हून उनेँ सौह्गे-सेआनेँ लोकेँ दे हत्थै च ऎ जेह्डे समाजै च व्यापी दी कुरीतियेँ दे प्रति चिँतित न ते इसदी असली तस्वीर, लुकाई अग्गै नित-नमेँ विशे राहेँ पेश करा'दा ऎ। डोगरी साहित्य च बी एह् बडी खुशी आह्ली गल्ल ऎ जे इसदे साहित्यकार बी हर ओह् चंगे-मडे विशे लेइयै लिखा'दा ऎ। फिकरमंद ऎ। अज्ज आक्खी सकनेआ जे डोगरी भाशा दा साहित्य हून दुनिया दे बाकी साहित्य कन्नै मकाबला करदा ऎ।इसदी एक मसाल शैलेँद्र सिँह हुंदा उपन्यास "हाशिए पर" जेह्डा अपने निग्गर कथानक करी चबक्खै चर्चा दा बिशे बने दा ऎ। कोई ऎसा साहित्यकार जां पाठक नेईँ जेह्डा इस उपन्यासै गी पढने परैंत चुप्प रे'आ होग उ'न्न किश-न-किश प्रतिक्रिया दित्ती गै। इयै कारण ऎ जे अज्ज केईँ भाशाएं च इस उपन्यास दा अनुवाद होआ ऎ। सभनेँ थमां खुशी आह्ली गल्ल एह् जे "आक्सफोर्ड यूनिवसिर्टी" ने इसगी अंग्रेजी भाशा च अनुवाद करने दी जिम्मेवारी अपने उप्पर लैती ऎ। इसदे बाद दुनिया दे हर एक कोने च एह् उपन्यास पढेआ जाग।
उपन्यासकार शैलेँद्र सिँह होर हून दूआ उपन्यास सेवाधनी लेइयै आए न जेह्डा इंदे पैह्ले उपन्यास आह्ला लेखा समाजिक ते समस्या प्रधानै। इस उपन्यासै दा कथानक 240एं सफेँ पर केँद्रित, बाल-मजदूरी समस्या गी उजागर करदा ऎ। डुग्गर दा प्हाडी इलाका रामनगर जित्थूं दी लुकाई गुरबत दी जिँदगी गै जीआ दी ऎ उस कोल अजेँ औह् बसीले नेईँ हैन जिस कन्नै अपना जीवन सुखी व्यतीत करी सकन।उत्थै सूरजै दी लो ते सभनेँ थमां पैह्ले पुज्जदी ऎ पर इल्म दी रोशनी अजेँ तगर नेईँ पुज्जी सकी। ते एह्दा सभनेँ थमां माडा असर नमीँ पौँद उप्पर पौँदा ऎ जेह्डी समाजै दा भविक्ख ऎ। जित्थै उंदे उज्जल भविक्ख दी बक्खी ध्यान होना चाहिदा ऎ। उत्थै गै ओह् गरीबी दे घेरे च फसे दा उ'नेँ लोकेँ दे हत्थै चढे दा जित्थै उसदे बकास आह्ली भेठा कोई ध्यान नेईँ दित्ता जंदा ते हर बेल्लै ओह् कोह्लू दे बैल आह्ला लेखा जुटे दा रौँह्दा ऎ। उसी समाजै च होने आह्ली कुसै बी चाल्ली दी चंगी-माडी गल्लै दा पता गै नेईँ लगदा। ओह्दे जीवनै दी गति रूकी दी गै लगदी ऎ। ओह् कुसैँ दे हत्थेँ पर गै निर्भर ऎ पर एह् हत्थ कदेँ बी मेहरबान नेईं होँदे बल्के इ'नेँगी निक्की-निक्की गल्लेँ उप्पर जातनां गै सैह्न करनी पौँदियां न।
कथानक:-सेवाधनी उपन्यासै च उ'नेँ ञ्यानेँ दी गै आधार बनाया गेदा ऎ जेह्डे अपनियां अक्खां गै गुरबत दी गुदडी च खोलदे न ते सारी उमर मेह्नत करने दे बाद बी सिर चुक्कियै जी नेईँ सकदे। एह् लोकेँ दे घरेँ, होटलेँ-ढाबेँ जां इट्टेँ दे भट्ठेँ उप्पर अपने बजूद थमां मता कम्म करी-करी ऎसी बमारियें दे शकार होई जंदे न ते केँई बारी इलाज दी कमी कारण सबेलै गै अपना लेखा खत्म करी जंदे न। सरकार आसेआ बी बत्थेहरियां योजनां बनाई जंदियां न पर उ'नेँगी लागू करने च इ'न्ने झमेले होँदे न जे ओह् उत्थै दियां उत्थै गै रे'ई जंदियां न।इस उपन्यास च बलदेव च'ऊं ञ्यानेँ दा बब्ब ते ओह्दी त्रीमत जेह्डी सताइयेँ-ठाइयेँ(27-28) ब'रेँ दी पर उप्परो-तली ञ्यानेँ होने करी बमार ऎ छडी हड्डियेँ दी मुट्ठ गै रे'ई गेदी ऎ। ओह् अपनी त्रीमत दी बमारी कारण म्हेशां परेशान रौँह्दा ऎ। ओह्दा इ'न्ना कोई कम्म-रूजगार बी नेईँ ऎ।ओह् ग्रांऽ थमां रामनगर बसाठियां बेचन जंदा ऎ जिसदी कमाई कन्नै मसां गुजारा गै होँदा ऎ। पर उ'नेँगी अपने जागत राजू (राजकुमार) उप्पर बडियां हीखियां-मेदां न जे एह् जुआन होइयै मदाद करग। इस्सै उमीँदै च राजू शैहर उधमपुर आई जंदा ऎ।जित्थै उस्सै दे ग्रांऽ दे दो होर बी जागत कम्म करदे न। कीजे डुग्गर दे प्हाडी इलाके च गुरबत बडी गै जादा ऎ इत्थै कम्मकाज दे साधन खासे नेईं हैन जिसकरी उ'नेगी शैह्रै आह्ली भेठा मूहं करना पौंदा ऎ। गरीबी कारण ञ्यानेँ गी पढाई बी नेईँ सकदे। ञ्यानेँ कोल सारी ध्याडी डंगर चारने ते खुल्ले-दलानेँ च दौडां लाने दे सिवा होर कोई चारा नेईँ ऎ गरीबी च पूरी चाल्ली गल्तान न।इस्सै हीखी च शैह्रै बक्खी चली पौँदे न। दसेँ-ञारेँ (10-11) ब'रेँ दी फौए ज'नेही जान, सारी ध्याडी कम्म करी-करी फाह्मेँ होई जंदा ऎ ते रातीँ'लै उसी कोई होश गै नेईँ रौँह्दी जे कुत्थै पेदा ऎ? सारा कम्म ओह् उड्डरी-उड्डरी इ'यां करदा ऎ जि'यां उसी कोई इनाम मिलना ऎ। थोह्डे जनेह् समेँ च गै सब्भै कम्म सिक्खी जंदा ऎ जि'यां होटलै पर आए दे ग्राह्केँ दी सेवा, जूठेँ भांडेँ मांझना होर सौत-फंड करना सब्भ करी लैँदा ऎ। ते एक ध्याडे जि'यां गै भांडे मांझन लगदा ऎ, उत्थै कढाई च पेदी गर्म पिच्छू कन्नै दवै हत्थ ते पैर सडी जंदे न, घरै थमां दूर, पीडै कन्नै तडफदा ऎ। पर बुआसरदा नेईँ ऎ। ठीक होने पर डा. सुशील चंद्र अपने घर कम्मै पर रखी लैँदा ऎ। उत्थै बी अपने कम्मै च कोई कसर नेईँ रौँह्न दिँदा। जिसकरी डा. दी घरैआह्ली ते ओह्दी धीऽ दा मन बी ओह्दे कन्नै लग्गी जंदा ऎ ते उसी घरै दे जीवै आह्ला लेखा गै समझदे न।.
उपन्यास च गै इक समाज सेवक धनी राम इ'नेँ ञ्यानेँ दे उज्जल भविक्ख बारै बडा फिकरमंद ऎ ते उ'न्न आधुनिक भारत समाज निर्माण दा जिम्मा लेदा ऎ जिस च बाल-मजदूरी गी खत्म करना चांह्दा ऎ ते ओह्दी गै कोशिशेँ करी सरकार आसेआ इक कानून बनाया जंदा ऎ जे जित्थै बी 14 ब'रेँ थमां निक्की बरसै दे जागत कम्म करै दे न उंदे मालकेँ उप्पर सख्त कारवाई कीती जा ते इ'यां इक खडमल्ली ज'नेही पेई जंदी ऎ जित्थै इट्टेँ दे भट्ठेँ उप्पर जां घरेँ, होटलेँ-ढाबेँ उप्पर कम्म करै दे गी, कम्मै थमां कड्डी दित्ता जंदा ऎ। जि'यां इक इट्टेँ दे भट्ठेँ पर कम्म करने आह्ले ञ्यानेँ गी कठुए थमां ट्रक च पाइयै जम्मू दे बस स्टैड पर इ'यां गै छोडी दित्ता जंदा ऎ जे बड्डलै परतियै उ'नेँगी बापस लेता जाग पर कोई बी उंदी सुरत नेईँ लैँदा ते उंदा द'ऊं-त्र'ऊं म्हीनेँ दा मेह्नताना बी नेईं दित्ता जंदा। इस कानून दे तैह्त राजू गी बी अपने घर ग्रां जाना पेई जंदा ऎ। जित्थै उसी लगदा हा जे हून ओह्दी जिँदगी किश उसरी जाग पर परतियै ग्रां आनियै उ'यै डंगर ते खुल्ले दलान गै लब्भदे न। राजू दी जिंदगी च परतियै इक मोड औँदा ऎ जित्थै इक होर डा. रामपाल दे घर कुसै दे आखने पर कम्म करन लग्गी पौँदा ऎ उत्थै ओह्दा छडा मानसक शोशन गै नेईँ होँदा बल्की शारीरिक जातनां बी सैह्न करनी पौँदियां न।जिसलै अति गै होई जंदी ऎ तां घर पेई दी दुआई खाई लैंदा ऎ। बलदेव अपने जागतै गी बापस ली आनदा ऎ। सोचदे न बशक्क उंदे घर गरीबी ऎ पर अपनी औलाद कन्नै बेसम्भ हिरख करदा ऎ। धनी राम हुंदे जतनेँ मूजब इक बारी फ्ही बाल-मजदूरी कनून च थोह्डा संसोधन कीता जंदा ऎ जे जित्थै ञ्यानेँ कम्म करदे न उंदे मालक गी उ'नेँगी किश घंटे पढाना बी होग।कीजे एह् ञ्यानेँ बी पढाई-लखाई थमां पिच्छै नेईँ रे'ई जान। जिसलै इस संसोधन दे बारे च डा. सुशील चंद्र गी पता लगदा ऎ तां ओह् परतियै राजू गी अपने घर ली आनदा ऎ। इत्थै उसी घरै आहला म्हौल गै मिलदा ऎ।डा . सुशील चंद्र ओह्दा दाखला सरकारी स्कूलै च करोआई ओडदा ऎ जित्थै ओह् मतेहान देन गै जंदा ऎ। राजू गी जिसलै बी बे'ल लगदी पढन लगी पौँदा ऎ। जि'यां-जि'यां एह् पढन लगदा ऎ ते बधन-मठोन लगदा ऎ इ'यां-इ'यां गै उसी दुनियादारी दी समझ आन लगी पौँदी ऎ। ते अपने भविक्ख बारै बी सौह्गा होई जंदा ऎ।धनी राम समाज सेवक दी लोकेँ दे प्रति कम्म करने दी लगन थमां राजू इ'न्ना प्रभावत होँदा ऎ। जेह्दा नारा शोशन थमां पढाई-लखाई आह्ली भेठै ऎ।ओह् बी उस्सै गैर-सरकारी संस्था च शामल होई जंदा ऎ। उ'न्न हून दिनै-रातीँ मेह्नत करियै बकील दी पढाई बी पास करी लेई ऎ। शैहर दे मश्हूर बकील चौधरी मसूद दी सरपरस्ती च होर बी मता सेआना बनी जंदा ऎ। आधुनिक भारत समाज दे सब्भै मुकद्दमेँ मुख्त गै लडदा ऎ। थोह्डे समेँ च गै ओह्दी शौह्रत इ'न्नी होई जंदी ऎ जे मन्ने-परमन्ने दे बकीलेँ च ओह्दा शुमार होँदा ऎ। अपने हत्थेँ च सच्चे मुकद्दमेँ गै लैँदा ऎ जिसकरी ओह्दी ईमानदारी ते कबलियत गी दिखदे होई उच्च न्यायधीश राजकुमार दे नां गी उच्च न्यायालय च न्यायधीश बनाने दी सफारश भेजदा ऎ जेह्डी मंजूर बी होई जंदी ऎ। न्यायधीश दी कुर्सी पर बौह्ने कन्नै खुशी ते होई पर मनै च संदोख नेईँ मिली सकेआ जिस कन्नै ओह् चैन दी जिँदगी बतीत करदा। उस कुर्सी पर आनियै उसी इ'यां लग्गा जि'यां ओह्दे ओह् सब्भै कम्म अधूरे गै रे'ई गे न जेह्डे उ'न्न करने दा प्रण कीते दा हा। दिनेँ-रातीँ धनी राम हुंदे चलाए दे मिशन गी पूरा करने दा सपना किश पिच्छै पौँदा से'ई होँदा ऎ। जिसकरी उसी बेचैनी ज'नेही सतांदी ऎ। इक दिन फैसला करी लैँदा ऎ जे ओह् इस कुर्सी उप्पर बेइयै कम्म नेईँ करी सकदा ते नौकरी थमां इस्तीफा देइयै धनी राम हुंदी गैर-सरकारी संस्था आधुनिक भारत समाज कन्नै परतियै जुडी जंदा ऎ।धनी राम बी संस्था दी भागडोर इक ईमानदार ते लगन कन्नै कम्म करने आह्ले नौजुआन दे हत्थै थमाइयै सुरखडू होई जंदा ऎ जे हून न्यांऽ गै होग।
शैलेँद्र सिँह हुंदे उपन्यास सेवाधनी गी समाजै दा अक्स आखना कोई अतिशोक्ति नेईँ होग कीजे इस च समाजै दी स्हेई तस्वीर दी गै गुआडेआ गेदा ऎ। जे अज्ज माह्नू इ'न्ना अराम-परस्त होई गेदा ऎ चाहे घर ऎ जां कोई निजी व्यवसाय कन्नै जुडे दा ऎ। कोई बी आपूं कम्म करियै राजी नेईं ऎ ओह् कम्म कराने आस्तै दूए माह्नू दा गै इस्तेमाल करदा ऎ। अपनी अराम-परस्ती ते मता कमाने दे चक्कर च दूएं गी गलाम बनाई रखदा ऎ। उसलै उसी इ'ब्बी ध्यान नेईँ रौँहदा जे एह् निक्के-निक्के ञ्याने अजेँ उस्स बरेसै च नेईँ पुज्जे दे,जे कम्म करी सकन। एह् इ'यै चांह्दा जे नौकरेँ-चाकरेँ दी लीह् लग्गी दी र'वै जिसकरी दूए दी जान दी परवाह् बी नेईँ करदा।उदी गरीबी दा नाजायज फैदा लैँदे होई उ'नेँगी पढाई-लखाई जां कोई होर कम्म रूज्जगार सखाने दी जिम्मेदारी नेईँ लैँदा बल्के अपने कन्नै जुगडी ते लैँदा पर जिसलै उसी खलाने दी बारी औँदी ऎ तां औँह्दे हत्थ-पैर कम्बन लगी पौँदे न।उसलै एह् नेईँ सोचदा जे उ'न्न बी इस्सै समाजै च होना-जीना ऎ ते चलना-फिरना ऎ। इस उपन्यास च उ'नेँ ञ्यानेँ गी अधार बनाने दा उपन्यासकार दा मकसद उस्स गिनौनी वृति आह्ले माह्नूएं गी सामनै आनी खढेरदा ऎ ते ओह् मासूम ञ्यानेँ जेह्डे अपने बचपन ते जोआनी गी लोकेँ दी सेवा करी-करी खत्म करी ओडदे न।सत्ते-सबेलेँ गै बढेपे दी पौढी चढी जंदे न।लेखक ने खत्म करने ते उ'नेँ बेबस ञ्यानेँ गी न्यांऽ दुआने आस्तै गै इस बिशे गी चुने दा ऎ।बाल-मजदूरी गी रोकना चर्चा दा विशे ते बनदा ऎ पर हर कोई इसगी खत्म करने च इ'न्ना गंभीर नेईँ लभदा,अज्ज बी ञ्यानेँ गरीबी कारण चाहे ओह् शैहर ऎ जां ग्रां होटलेँ-ढाबेँ, इट्टे दे भट्ठेँ पर कम्म करदे जां गलियेँ-कूचेँ च झोले पाइयै कूडा किट्ठा करियै बेचदे लभङन। कोई इ'नेँगी मूंडू बनने थमां नेईँ रोकदा। इंदियां बचपन दियां खेढां, माँ-बब्ब दा प्यार, उंदा मानसक बकास, पढाई-लखाई सब्भ किश पिच्छै रे'ई जंदा ऎ। जि'यां:-
1.उपन्यासै च चित्रत बाल पात्तर- उपन्यासै च चित्रत बाल पात्तर राजू (राजकुमार) बीरी, काला, रोशन, मंगल बचपन थमां गै ऎसे गुंझलेँ च पलचोए दे न जेह्डे जिँदगी भर दरोडने पर बी नेईँ खुलदे। सारी ध्याडी कम्म करी-करी उट्टी जंदे न पर उंदे आस्तै सुखै दी घड़ी नेईँ औँदी। बचपन च जित्थै ञ्यानेँ मस्ती च खेढां खेढी-खेढी गुजारदे न पर इ'नेँगी बालपुनेँ दी मौज-मस्ती नेईँ मिलदी। इ'यां इस उपन्यासै च बीरी जेह्डा चाई आह्ली हट्टी पर कम्म करदा, नित्त रोज औह्दा मालक निक्की- निक्की गल्लेँ उप्पर उसी मारदा-कुट्टदा ऎ।उपन्यासै मताबक बीरी इक बारी जागतेँ गी ब्हांटेँ खेढदे दिक्खियै आंपू बी उंदे कन्नै खेलन लगी पौँदा ऎ ते दकान दा मालक सरदारी शाह उसी सजा दे तौर पर ऎसी मार मारदा जिस कन्नै ओह्दे मूहं उप्पर फलियां पेई जंदियां न।उपन्यासै मताबक,"एह् हट्टियै पिच्छै दूए जागतें कन्नै ब्हांटेँ खेढै कर'दा हा। सरदारी शाह ने फगडियै द'ऊं-चार सुट्टी टकाइयां।" (सफा- 28) एह् मार उसी जरा सारी गलती पर बी पौन लगी पौंदी ऎ।इ'यां गै सरदारी लाल इक बारी लफ्फडै दी ऎसी लांदा ऎ जिस कन्नै उसलै गै ओह्दा दंद भज्जी जंदा ऎ। जि'यां," इसदे मालक सरदारी ने इक ध्याडे रोहै च आनियै बडलै-बडलै गै लफ्फडै दी लाई ते बीरी मूहै दे भार भुंजै, ओह् जाई पेआ हा। सारा मूहं खूनो-खून होई गेआ हा।" (सफा-161) एह् सब्भै अपने मालकेँ दे सताए दे गै न, राजू बी अपनी मालकन दी जातनाएं थमां तंग होए दा दवाइयां खाई लैँदा ऎ। उसदे शरीर उप्पर बी मारै दे नशान पेदे न। जेह्डी उंदे कन्नै इंदे मालकेँ दी बदसलूकी ऎ। जिसकरी एह् जागत किश सैह्मेँ-सैह्मेँ ते डरे-डरे दे रौँह्दे न।
2. लाचारी:-उपन्यासै च इंसान दी लाचारी ते बेबसी दा मार्मक चित्रण होए दा लब्भदा ऎ। मजदूरी च ओह्दी कुसै दे अग्गै बी नेईँ चलदी। राजू, काला इ'न्ने बेबस न जे ओह् कम्म खत्म करियै जिसलै किट्ठे बौँह्दे न तां अपने मनेँ दे दुक्ख-सुक्ख इक-दूए कन्नै फरोलदे होई मनै दे गब्बार कडढदे न। कदेँ उ'नेँगी अपने ग्रां दे ओह् खुल्ले दब्बड, जंगल-जाड चेता औँदे न ते कदेँ घर ते घरेँ दे अपने जीऽ जिँदे सुखी भविक्ख आस्तै घरै दा बाहर आए दे न। राजू ते काला आनो-आनी (हमउमर) होने करी उंदी आपूं चेँ बनदी खासी ही जिसलै बी कम्म निब्बडदा निक्कियां- निक्कियां गल्लां करन लगी पौँदे कीजे उत्थै उंदी सुनने आह्ला कोई नेईँ हा। इ'यां इक रोज भांडे मांझदे होई घरै दियां गल्लां करदे न। उ'नेँगी स्कूल नेईँ जाने दा मलाल बी ऎ पर सभनेँ थमां मता झोरा ते ओह् ग्रांऽ जित्थै पूरी ध्याडी खेढदे रौँह्दे हे कोई रोक-टोक नेईँ ही,"खेढने दा ते सच्चेँ गै बडा मजा औंदा हा पर दिनै जाडै च ते भुक्खे-भाने गै फिरदे रौँह्दे हे ते जां फ्ही ग'रने चुनियै खंदे रे'ह् आं। इत्थै ते पूरा-पूरा दिन कम्म गै करदे रौँह्ने आं। केँई बारी घरै दा बडा चेता औंदा ऎ। पर इक गल्ल ऎ जे इत्थै अस रूट्टी ते शैल बन्न-सबन्नी खन्ने आं। घर ते बस उ'ऎ मक्कै दे ढोडे ते कन्नै दाल-सलूना।" (सफा-37) पर राजू गी घरै आह्ले दा चेता औँदे गै चेह्रा हिस्सी जंदा ऎ जे इत्थै ते आपूं शैल खंदा ऎ। घरै आह्लेँ गी किश नेईँ मिलदा," एह् सब्भै किश अस आपूं गै खन्ने आं, घरै आह्लेँ गी ते नेईँ देई सकै दे।" (सफा-37)
3.शोशन :-उपन्यासै च इ'नेँ जागतेँ उप्पर होने आह्ले शोशन दा जिकर बी बखूबी कन्नै होए दा ऎ जे इंदे मालक इंदे कम्मै दे गाह्की ते हैन पर चम्मै दे नेई। ओह् उ'नेँगी जरा-जरा गल्लां पर चंड-तफ्फा लाने थमां बी पिच्छै नेईँ होँदे। एह् मालक ते इंदे कन्नै इ'यां सलूक करदे न जि'यां इ'नेँगी कम्मै पर नेईँ रक्खे दा बल्के खरीदी लेदा ऎ।पर एह् दिनै-रातीँ उंदी सेवा च हाजर रौँह्दे न।जि'यां राजू, काला, रोशन, बीरी बगैरा इ'नेँ होटलेँ-ढाबेँ उप्पर कोई 7-8 घंटे नेईँ बल्के 17-18 घंटे कम्म करदे न। इसदे बाबजूद बी इंदे कन्नै खुश नेईँ हैन सगुंआ इंदे उप्पर रोह् गै छंडदे न।इ'नेँगी ओह् प्यार नेईँ मिलदा जिसदे हकदार न। इस्सै उपन्यासै च राजू कन्नै ओह्दी मालकन रेखा इ'यां सलूक करदी ऎ जि'यां कुसै जानवरै गी रातीँ'लै घरै बाहर बन्नेआ जंदा ऎ। इस गल्लै दा ध्यान बी नेईँ रक्खेआ जंदा जे इस कन्नै उंदी ऎशोआराम दा पूरा दरोमदर जुडे दा ऎ। एह् इक अह्म जीऽ होना चाहिदा ऎ पर इसगी गै बदसलूकी दा शकार बनाया जाग तां उंदे कम्म कि'यां उसरने न।सेवाधनी उपन्यास दा एह् प्रसंग बडा गै हैरानी पैदा करने आह्ला ऎ जे निक्के जागत थमां पूरा दिन कम्म कराने दे परैँत जिसलै रातीँ'लै ओह्दे अराम करने दी बारी औँदी ऎ तां उसदी मालकन रेखा इक परानी ज'नेही खिँध ते चादर बालकनी च बछाने आस्तै आखदी ऎ ते अंदरै भित्त बंद करी लैँदी ऎ," सरकारी क्वाटरेँ दे बाहर, हास्पतालै दी चारदवारी अंदर कूडा-करकट ते क्वाटरेँ दे पानियै कन्नै जंगली घा बी शैल फैले दा ऎ। विस्तरा बछाइयै राजू हाल्ली लेटेआ बी निहा जे अग्गूं-पिच्छूं दा मच्छर पैह्ले गै पुज्जी गे। (सफा-105) एह् सब्भ पढने दे बाद इ'नेँ लोकेँ दे बतीरे पर रोह् चढन लगी पौँदा ऎ।राजू रेखा दे अडब सभाऽ करी हर बेल्लै मसोसे च रौँह्दा ऎ।इत्थुं तगर जे उसी मारी बी लैँदी ऎ। राजू इत्थुआं जाने दे बाद बी इ'न्ना त्राही ते मानसक बमारी दा शकार होई जंदा ऎ जिसलै कोई ओह्दे सिरै उप्पर प्यार कन्नै हत्थ बी फेरदा ऎ तां डरी जंदा ऎ। जि'यां," भारती दा हत्थ अपने सिरै कन्नै छ्होंदे गै राजू त्र'बकियै छटापा मारियै पिच्छेँ होई गेआ। उसी लग्गा जि'यां ओह्दे बालेँ गी फगडियै उसगी कोई मारन लगा होए।" (सफा-105) एह् लक्ष्ण मानसकता दे गै न।
4.स्वाभिमान:- इस गल्लै थमां नकार नेईं कीता जाई सकदा जे माहनू मूढां थमां गै लालची वृति आह्ला रेहा ऎ बशक्क जि'न्ना मर्जी समेँ दे फेर कन्नै नरमी आह्ला फरेब करै पर अपना मतलब आह्ने पर ओह्दे अंदर स्वार्थ दे बी कुजरदे गै न। इ'यां गै राजू दे स्वाभिमान गी उसलै जोऽ पुज्जदा ऎ जिसलै भारती दी स्हेली पिँकी ओह्दे घर औँह्दी ऎ तां राजू दा कम्म दिक्खियै ट'ऊ होई जंदी ऎ ते राजू गी अपने ज'नेआ गै कम्म करने आह्ला नौकर आनी देने दी गल्ल करदी ऎ। जां ओह्दी निक्की भैन गी नौकर रखने पर जोर पांदी ऎ।राजू दे मनै च ओह्दे प्रति नफरत होन लगी पौँदी ऎ। सोचदा ऎ," ग्रांऽ च हाल्ली बी अगर कोई कंजकां पूजदा ऎ ते उषा गी बी ते ओह्दे थमां बड्डी-बड्डी कुडियेँ गी बी बलाइयै पूजदे न। ते फ्हिरी कंजकेँ गी नौकर रखना 'पाप' निं होग ते होर केह् होग।" (सफा-95) एह् आह्ली गल्ल अजेँ ओह्दे मनेँ च निकली दी नेईँ ही जे इक ध्याडे भारती बी ऎसी गै गल्ल करी ओडदी ऎ. जिसलै राजू अपनी ते भविक्ख दे प्रति जागरूक होई जंदा तां भारती गी लगदा ऎ जे एह् पढी-लिखी गेआ ऎ जिस कन्नै कम्मकाजै च बी फर्क पाबै दा ऎ।भारती दे मनै च औँदा ऎ जे राजू दा व्याह् कराई दित्ता जा तां जे राजू दी घरैआह्ली बी घरै दे कम्मै च हत्थ पोआग। पर इंदियां गल्लां राजू दे स्वाभिमान गी हलाइयै रखी ओडदियां न ते गूढी सोच च पेई जंदा ऎ।"मेँ ते इत्थै कम्म करनां ते तुसेँ मिगी स्हारा दित्ता पर इसदा एह् मतलब ते नेईँ जे मेरी घरैआह्ली नौकरानी गै बनै। मेँ ते अपनी जिँदगी च इ'न्ने उतार-चढो दिक्खे न पर मेरी घरैआह्ली बी इ'यां जून भोगै, इ'यां. ते मेँ कदेँ बी नेईँ चाह्ङ।" (सफा-116) इ'यां उसी भारती उप्पर खिँझ चढन लगदी ऎ ते आखर मैडम बी ओह्दी घरैआह्ली उप्पर नौकरानी आह्ला गै हक्क रखना चांह्दी ऎ।
5.ञ्यांनेँ दे बधने-मठोने दी चैँता;-ईश्वर दी लीला बी बडी न्यारी ऎ जे जिसलै अमीरेँ दी औलाद बधन-मठोन लगदी ऎ तां उंदियां बासां खुशी कन्नै खिडी जंदियां न उत्थै गै बलदेव दे परिवार च उंदे चेहरे पर परेशानी ते फिकर दियां लकीरां गुढियां खचोई जंदियां न जे ञ्यांनेँ बड्डे माह्नू आंगर गै खंदे न।शकुंतला अपने घरैआह्लै कन्नै घरै दी चैँता करदे होई आखदी ऎ," जागत बी हून बड्डे होई गेदे न। माह्नू आंगर जि'न्ना गै खंदे न।" (सफा-11) कीजे बलदेव दा कम्म बी इ'न्ना नेईँ ऎ उ'यां बी जित्थै ञ्यांनेँ जुआन होवै दे न उत्थै आपूं ढलदी बरेसा च आवै दा ऎ जिसकरी उंदी चैँता जायज ऎ। इस थमां बी बधीक शकुंतला दा बमार होना ऎ। जित्थै बमारी करी घरै च पैह्ले गै पूरी नेईँ पौँदी।
6. माऊ दी ममता:- माऊ दी ममता गी कुसै बी त्ररकडी पर तोलेआ नेईँ जाई सकदा भामेँ ओह् अमीरेँ दी मां ऎ चाहे गरीबेँ दी।मां दी ममता दी कोई हद्द नेईँ, एह् सीर उमर भर बगने आह्ली ऎ जेह्डी कदेँ नेईँ सुकदी। सेवाधनी उपन्यासै च राजू जिसलै ग्रांऽ थमां शैहर जाने आस्तै अपने परिवार थमां बक्ख होँदा ऎ तां एह् सतरां पढदे होई पाठक बडा गै भावुक होई जंदा ऎ जिस चाल्ली उंदे मनेँ च घरमोल पौँदे न, इक-दूए थमां खिँडना, परिवारै दा इक्कला जागत, त्र'ऊं भैनेँ दा भ्रा ते उ'ब्बी अज्ज शैहर जाइयै इक्कला रौह्ग। जि'यां," घर निकलने कोला पैह्ले शकुंतला ने राजू गी घोटियै अपने गले कन्नै लाई लेआ ते ओह्दी अक्खी च अत्थरुं टपकी आए। शकुंतला दा गला बी भरी आएदा हा ते इस लेई मुट्टी बाजै च गै ओह् राजू गी आखै करदी ही," राजू पुत्तर अपना ध्यान गै रखेआ ते कन्नै मन लाइयै कम्म करेआं।" (सफा-17) फ्ही बी अपना कालजा बड्डा करियै उसी मन लाइयै कम्म करने आस्तै सिक्खमत गै दिँदी ऎ।
7. आत्मविश्वास:-सेवाधनी उपन्यासै दा नायक राजू (राजकुमार) जेह्डा बचपन च मुंडू बनियै शैहर उधमपुर कम्म करने आस्तै आया हा उ'न्न कदेँ सोचेआ बी नेईँ हा जे उ'ब्बी इक दिन कुतै ऎसी कुर्सी उप्पर बौह्ग जित्थै ओह् फैसलेँ दा नबेडा करियै लोकेँ गी न्यांऽ दोआग करग। जि'यां-जि'यां बक्ख-बक्ख थाह्रेँ पर कम्म करन लगदा ऎ इ'यां-इ'यां गै ओह्दे अंदर इक आत्मविश्वास पनपन लगी पौँदा ऎ ते एह् सब्भ पढाई-लखाई दी बदौलत गै ऎ जिसलै धनी राम ज'नेआ समाज सेवक बाल-मजदूरी दे खलाफ मुहिम चलाइयै इ'नेँ बाल-मजदूरेँ गी पढने दा हक्क बी दुआंदे न जे कम्म दे कन्नै-कन्नै इ'नेँगी इंदे मालक पढान बी ज़रुर। इसदा फैदा राजू गी बी होँदा ऎ। राजू घरै दे कम्मै दे कन्नै-कन्नै लगन ते मेहनत कन्नै पढी-लिखियै बकील बनी जंदा ऎ। ओह्दे अंदर आत्मविश्वास आई जंदा ऎ जिसकरी धनी राम समाज सेवक दी गैर-सरकारी संस्था कन्नै जुडने करी उत्तरी भारत दे सब्भै बाल-मजदूरेँ मुकद्दमेँ दी जिम्मेबारी अपने उप्पर लेई लैँदा ऎ। ओह्दे ञ्यांनेँ गी इंसाफ दुआना जेह्डे ओह्दे आंगर इस दलदल च फसे दे न। उंदा दुखडा सुनदे गै उसी अपना बचपन चेता औह्न लगी पौँदि ऎ। उपन्यासै मताबक," उसदे सामनै जिसलै बी कोई बाल-मजदूरेँ ते शोशन दी गल्ल छेडदा तां उसी अपना बचपन चेता आई जंदा ऎ।"( सफा-17) राजू दे अंदर आत्मविश्वास गी दिखदे गै धनी राम समाज सेवक अपनी संस्था आधुनिक भारत समाज दी जिम्मेबारी राजू दी गै सौँपी दिँदा ऎ।
8. बाल-मजदूरी गी खत्म करने दे सुझाऽ:-इस गल्लै गी नकारेआ नेईँ जाई सकदा जे साहित्यकार जित्थै साहित्य रचेता ऎ उत्थै गै समाजै च व्यापी दी समस्याएं कन्नै निबडने दे सुझाऽ बी दिँदा ऎ। जि'यां इस उपन्यास च उपन्यासकार शैलेँद्र सिँह होर बाल-मजदूरी समस्या गी लेइयै पाठकेँ सामनै आए न तां उ'नेँ फैली दी समस्या दे तत्थ-आंकडे शीशे आह्ला लेखा स्पश्ट दस्से दे न जे दुनिया च 24 करोड थमां बी जादा ञ्यांने कम्म करै दे न ते सभने थमां मती संख्या भारत च ऎ। संयुक्त राष्ट्र दी ञ्यांने आह्ली शाखा दा मनना ऎ जे अस्सी (80) प्रतिशत थमां जादा बाल- मजदूर ऎसी थाह्रें उप्पर कम्म करदे न जित्थै पुज्जना बी मुशकल ऎ जि'यां खेतरेँ, जंगल-जाडेँ च जित्थै डंगर चारन जंदे न।एह् अपने घरेँ च बाल-मजदूरी दे शकार न इंदे उप्पर प्रतिबंध लाना बडा मुशकल ऎ। पर जेकर एह् 14 ब'रेँ थमां लौह्के ञ्यांनेँ कम्म करदे न तां एह् इल्म थमां मैह्रुम होई जंदे न ते एह् गरीबी करी पढाई-लखाई थमां कम्मै गी जादा तबज्जो दिँदे न। लेखक दा एह् मनना ऎ जेकर एह् बाल-मजदूर पढन जाने थमां पैह्ले निक्के-निक्के कम्म करी लैन तां इंदी विकास वृति आस्तै बी फैदेमंद ऎ जि'यां स्कूल जाने थमां पैह्ले लोकेँ दे घरेँ च अखबार सु'ट्टना, स्कूलै दियेँ छुट्टियेँ च कोई होर निक्का-मुट्टा कम्म करी लैना एह्दे च कोई हर्ज बी नेईँ ऎ सगुआं उंदे शरीरिक ते मानसक विकास च बादा गै होँदा ऎ। ते इक-दम बाल-मजदूरी खत्म करने कन्नै केँइयेँ दे घरेँ दे चु'ल्ले सिल्ली सकदे न। एह् द'ऊं धारी तलबार ऎ। जि'यां ," जागतेँ दे कम्म करने गी अस इ'यां दिखचै जे एह् इक लैन (line) ऎ जिसदे इक सिरे उप्पर इ'नेँ निरा शोशन ते नकारात्मक कम्म न। ते दूए सिरे उप्पर इ'नेँ ञ्यांने आस्तै पढाई-लखाई, खेढने-कुद्दने गी बिना कुसै रुकाबट दे बढाबा देना ते बाकी उ'ब्बी सारे कम्म जेह्डे विकास-वृद्धि आस्तै फैदेमंद होँदे न। इ'नेँ दौँने सिरेँ दे विच होर बाकी सारे कम्म उं'दी नोइत दे स्हावै कन्नै रक्खे जाई सकदे न।" (सफा-115) उ'नेँ सबभै गल्लेँ दा ध्यान रक्खेआ जा जिस कन्नै कोई नक्सान नेईँ होवै।
9. शीर्शक दी व्याख्या:- सेवाधनी दा शाब्दिक अर्थ सेवा करने च धनी अर्थात सेवा च कोई कसर छोडने आह्ला नेईँ। उपन्यास दा शीर्शक अपने कथानक मताबक पूरा न्यांऽ करदा ऎ। राजू (राजकुमार) जेह्डा बचपन च ते पैह्ले लोकें दी सेवा छडी तन, मन कन्नै करदा ऎ पर जुआन होइयै बकील बनने पर ओह् धन कन्नै बी लुकाई दी सेवा करन लगदा ऎ। जेह्डे लोकेँ कोल पैहे दी तंगी होँदी ऎ उंदे मुकद्दमें मुख्त गै लडदा ऎ। इ'यां तन, मन, धन कन्नै सेवा करदे होई सेवाधनी खुआने दा हक्क रखदा ऎ। उपन्यास दा शीर्शक बिल्कुल सार्थक ते कथानक कन्नै मेल खंदा ऎ।
10. भाशा:-उपन्यास च बरतोई दी भाशा आम बोलचाल दी भाशा ऎ। कुतै बी अश्लील जां कलिश्ट शब्देँ दी बरतून नेईँ होई दी सगुआं सरल भाशा दा प्रवा कथानक गी गति दिँदे होई कडी कन्नै कडी जोडदे होई मकाम तगर लेई जंदा ऎ।
निश्कर्श:-निश्कर्श दे तौर पर जे एह् आक्खेआ जा जे एह् विशे बडा गम्भीर ऎ जे अज्ज कनून लागू होने दे बाद बी ओह् ञ्यांने उ'आं गै ढाबेँ उप्पर जां अफसरेँ दे घरेँ मुंडू बने दे कम्म करै दे न। एह्दे च सरकार ते अस लोक जदूं तगर थोह्डे इ'यै ज'नेह् विशे उप्पर गम्भीर नेईँ होगे तदूं तगर एह् समस्या बनी दी गै रौह्नी ऎ। सरकार ते शायद गम्भीर ऎ इस बाल-मजदूरी गी रोकने लेई पर हून इक बारी फ्ही सर्वे करोआया जा'रदा ऎ जे कोई बच्चा अनपढ नेईँ रौँह्ना चाहिदा इस च इत्थै बी साढा अपना गै दोश ऎ अस उ'नेँगी कोई स्हेई जानकारी नेईँ दिंदे जिसकरी सैह्जोग नेईँ होने करी दिक्कत आवै दी ऎ।
उपन्यासकार शैलेँद्र सिँह हुंदे अग्गै गुजारिश ऎ जे इ'यै जनेए विशे लेइयै औँदे रौँह्न जिसकरी पाठकेँ गी नित-नमेँ विशे पढने गी मिलङन।
-----------------------
Dr. Chanchal Bhasin
Lecturer Dogri
Subscribe to:
Post Comments (Atom)
No comments:
Post a Comment