उडनखटोला ( डॉ. चंचल भसीन )
चेतें दे रंगले उडनखटोलै बेही
उड्डरी दूर
जाई पुज्जी माऊ दी निग्घी बुक्कली च
ते
दिन आई गे चेतै
बचपनै दे
जदूं शरारत करने पर
चाची, ताई
मामी जां मासी
बूंह्गड़ी फड़ी
मुंहै च बुड़बुड़ करदे
लाह्मा देन औंदियां
खड़ेरी दिंदियां माऊ सामनै ।
माऊ दा भरी नजरीं नै दिक्खना
ते
अक्खीं-अक्खियें नै
खल्ल दर्हेड़ी देनी
सैह्मियै मेरा नुक्करै जाई लग्गना
उं’दे जाने मगरा
बोलना नेईं
रुट्टी नेईं देनी
जिसलै गुबार ठंडा पवै
लाड लाने
गलै लाना
अपनी अक्खीं भरी
मी बी रोआना
घोटी जफ्फी पाई
निग्घ देना
अज्ज फ्ही इस डोआरी दे चेतें च
उस्सै निग्घै दी
भखन मसूस होई।
....................................................................
Dr. Chanchal Bhasin, Author Chanchal Bhasin
