परवाह

 

शिकायत

 

उडनखटोला-इक सकारात्मी कविता-संग्रैह्

                                 

                           उडनखटोला-इक सकारात्मी कविता-संग्रैह्        (चूनी लाल शर्मा)          

डॉ. चंचल भसीन हुंदा कविता-संग्रैह्-‘उडनखटोला’ पढ़ने दा मौक़ा मिलेआ। पढ़दे-पढ़दे, सारिया रचनां पढ़ियां। मन-चित्त लग्गियां। भाव-छुआलें दे लुआरे बी लग्गे ते मानवी मानसिकता दी संवेदनशीलता बी मसूस होई। एह् बी बज्झोआ जे अज्ज मनुक्ख संवेदनात्मक सोच गी पिच्छै छोड़ियै, सुआर्थी सोच दे सफ़र खर्चें गी लेइयै अपनी मंजल हासल करना मता पसिंद करदा ऐ। मिगी एह् समझा आया जे इस संग्रैह् दियां कवितां विचार प्रधान, अर्थमूलक ते सोचने पर मजबूर करने आह्लियां न। पाठकें-श्रोताएं गी झुनक कराने आह~लियां बी ते वेदना-संवेदना जगाने आह~लियां बी न। यथार्थ दा बोध करांदियां ते नमीदी दे न्हेरें चा बाह~र निकलने आस्तै लोऽ बी दस्सदियां न। यानि हर इक कविता इक संदेशवाहक दा कम्म करदी ऐ। 

‘उडनखटोला’ पर गल्ल करने थमां पुज्ज कविता सरबंधी गल्ल करना बी मनासब होग। गल्ल इ’यां ऐ जे मनै दे भावें-विचारें ते अनुभूति गी कुंगले शब्दें बोलें दा रूप देना ऐ कविता। घट्ट थमां घट्ट शब्दें च बड्डी थमां बड्डी अर्थपूर्ण गल्ल आखने दा जरिया ऐ कविता। पैह~ले ते कविता काव्य शास्त्र विधान च बज्झी दी होंदी ही पर हून उ’नें बंदशें चा बाह~र निकलियै कविता सुतैंतर रूप लेई चुकी दी ऐ। काव्य रचना भाएं छंदमुक्त होऐ जां छंदयुक्त, ओह्दे च भाव, विचार, अर्थ ते पाठक-श्रोता दे मनै च उतरने दी कला दा होना लाजमी ऐ। वेदपाल दीप हुंदा गलाना ऐ जे-

अक्खरें दा नेईं तमाशा चाहिदा

शायरी च अर्थ मासै चाहिदा।

 

वेदपाल दीप होरें एह् गल्ल शैद गजल दे संदर्भ च आखी होग पर कविता च बी एह् गल्ल सार्थक ऐ। की जे मनासब शब्दें दी चोन-बरतून ते विचार संप्रेशण दी शक्ति कविता च बी होना ज़रूरी ऐ तां जे कविता प्राणवान बनी र’वै। बारीकी कन्नै दिक्खेआ जा तां कविता दे एह् सारे ज़रूरी तत्व डॉ. चंचल भसीन हुंदे ‘उडनखटोला’ दियें सारियें कविताएं च मजूद न। उ’आं बी दिक्खेआ जा तां कविता रचना तप-तपसेआ, तड़फ ते त्याग दा फल्ल होंदा ऐ। 

कवित्री चंचल भसीन अपने संग्रैह् दी ‘कविता’ शीर्शक कविता च गलांदियां न-

में कविता गी जीन्नी आं

मसूसनी

लिखनी

बोलनी

पढ़नी आं

एह् मेरे अंग-संग हर ’लै 

हर गैं टुरदी ऐ।

+ + +

मेरे सुखने च 

मेरे रोसे च

मेरे अत्थरूएं च

+ + +

हर गैं टुरदी ऐ।   (सफ़ा- 94)

कविता लिखना कोई असान कम्म नेईं। मनै दे भाव उब्बलदे-उछलदे न तां कविता जनम लैंदी ऐ। ओह् बुआल-छुआल भाएं अपने कालजे दे होन भाएं दुएं दे कालजें दे मसूस कीते जान। कविता लिखने आस्तै तपदे रेगिस्तानें ते उब्बलदे जुआला-मुखियें दा सेक सैह~ना पौंदा ऐ। 

‘उडनखटोला’ संग्रैह् पढ़ने पर लगदा ऐ जे कवित्री ने समाजी जीवन दे पर पक्ख-पैह~लू गी बड़ी बरीकी नै पढ़ने, धलोफने ते घोखने दे परैंत अपनियें कविताएं दी रचना कीती दी ऐ। संग्रैह् दियें रचनाएं च कोई बनौटीपुना नेईं। सब सुभावक कोरजू पानी दे लगद बगने आह~ले सूह्टे-सीरां

न।

इस कविता-संग्रैह च पचुंजा (55) कवितां न। इंʼदे च नारी-विमर्श, आशावाद, यथार्थ चित्रण, मानवतावाद, दुनियादारी, व्यवहारता, वेदना-संवेदना, सुखद-दुखद अहसास, अनुभव-अनुभूतियां, विचारक विशे ते भावनात्मक सोच ते तत्त्वें दी प्रधानता ऐ। कुतै-कुतै रैहस्यवादी झोन बी लब्भदी ऐ। कविताएं च सकारातमी सोच दी मुखरता ऐ। 

नारी सशक्तिकरण मूंह् बोलदी तस्वीर दिक्खो ‘हौसला’ कविता दियें इʼनें पंगतियें च:

पढ़दी-गुड़दी ऐ

अग्गै-टुरदी ऐ

मुड़ी पिच्छै दिखदी नेईं

हत्थ अडदी नेईं

करदी ऐ हीले

+ + +

इन्न सिक्खी लेआ 

जीने दा सार 

जे

पढ़ने-लिखने कन्नै गै

होना ऐ पार। (सफ़ा- 33)

इʼयां गै नकारातमी सोच गी पछाड़दियां ‘लीकरां’ कविता दियां एह् पंगतियां न:

शीशा दिक्खी त्राह-जन लग्गेआ

शीशे इचा झांकदी ओह् हस्सी ते बोल्ली

+ + +

एह लीकरां परेशानियें दियां नेईं

तजर्बे दियां न

तेरी उमरा दी कमाई न

वरासत ऐ

जिस्सी हर ब’रा जंदे-जंदे तुगी 

सौंपी गेआ ऐ। (सफा-44)

अज्ज हर कोई मेरा-मेरे दे फेरें च फसेदा उस परमेसर गी भुल्ली जा दा ऐ, जिस नै इस सारी स्रिश्टी दी रचना कीती ऐ। उʼऐ सर्वशक्तिमान इस कायनात गी चलाʼरदा ऐ। संग्रैह् दियें किश कविताएं च उस मालक दी सत्ता काबूलने दे प्रमाण बी मिलदे न। 

‘मेरा-तेरा’ कविता च कवित्री दी रैहस्यवादी सोच दा परिचे दिक्खो:

एह् चढदा सूरज तेरा ऐ,

एह् संझ घरोंदी तेरी ऐ।

बिजली दी लिश्कन तेरी ऐ

एह् न्हेरे-मन्हेरा तेरा ऐ।

फ्ही की एह मेरा तेरा ऐ,

जे दुनिया रैन बसेरा ऐ।

किश तेरा ना किश मेरा ऐ।

+ + +

एह् जंगल-झाड़ तेरा ऐ

फुल्लें दी ब्हार तेरी ऐ। (सफ़ा- 29 )

एह् कविता पढ़दे-पढ़दे मिगी जय शंकर प्रसाद रचित ‘कामायनी’ महाकाव्य दे आशा सर्ग दियां एह् पंगतियां चेतै आई गेइया हियां:

महानील के परम व्योम में

अंतरिक्ष मेंज्योमार्न

ग्रह, पक्ष और विद्युतकन

करते हैं किस का संधान 

+ + +

तृण वीरुध लहलहे हो रहे

किस के रस से सिंचे हुए? 

आखेआ ज़दा ऐ-‘मामां ठंडिया छामां, जां फ्ही मां दे चरणें च जन्नत दे नजारे’। एह् इस करी बी सच्च ऐ जे सुर्ग जेकर लब्भदा बी होग तां मरने परैंत। पर मां ते अपने जींदे जी अपनियें संतानें गी ते ठंडी छां गै दिंदी ऐ। इस संग्रैह् दियां कवितां ‘मां’ ते ‘उडनखटोला’ मां दे म्हत्तव, मैह~मा ते म्हानता गे दिग्दर्शन करांदियां न। मां दे होने दा सुखद अहसास ते नेईं होने दा दुखद दर्द ते चेते दियां तंदां इʼनें कविताएं च लब्भदियां न। 

‘मां’ कविता दियां पंगतियां न:

मां-मां मिं गल्ल सनाऽ, 

की गेई तूं ओह्के थाह~र

जित्थुआं नेईं परतोंदा कोई घर

+ + +

सुच्ची रूट्टी, कु’न्न पकाऽ

ख़ुशी-ख़ुशी, सभनें गी खलाऽ। (सफ़ा- 76)

इʼयां गै ‘उडनखटोला’ कविता च मां दी ममता दा निग्घा भाव मुखरत होंदा ऐ। मां अपने जाऐं गी निक्खरदी-झिड़कदी ते धौल-थफ्फड़ बी करदी ऐ, पर एह् सब उंʼदे भले गितै होंदा ऐ। मां जेकर नराज बी होई जा तां बी ओह्दी ममता तौले गै छलकन लगी पौंदी ऐ। एह् पंगतियां दिक्खो:

जिसलै गुबार ठंडा पवै 

लाड लाने

गलै लाना

+ + +

अज्ज फ्ही इस डुआरी दे चेतें च

उस्सै निग्घै दी 

भखन मसूस होई। (सफ़ा- 97)

 ‘उडनखटोला’ दियां केईं कवितां मानवतावादी सोच दी टकोदगी नमांयदगी करदियां न। जिʼयां ‘लाचारी’ ते ‘मूर्ति’ कवितां। 

‘लाचारी’ कविता उस मज़दूर बच्चे दी वेदना प्रकट करदा ऐ जेह्ड़े सरै दे कंढै आटे दियां गिल्लियां गोलियां बनाइयै मच्छियें गी आटा पाने आह~ले गाह्कें दा इंतज़ार भुक्खे-भाना गै कराʼरदा ऐ:

मिगी ते तां गै मिलनी ऐ जेकर 

मच्छियें गी आटा मिलग। (सफ़ा- 83)

एह् कविता बाल-मजदूरी गी लेइयै व्यवस्था पर इक सुआल खड़ेरदी ऐ। 

इʼयां गै ‘मूर्ति’ कविता च मूर्तियां बनाई बेचने आह~ले दी दीनहीन दी दशा उजागर करदी ऐ ते साढ़ी समाजी व्यवस्था पर करारी चोट बी करांदी ऐ:

इस थमां 

मूर्तियां खरीदी 

उं’दी पूजा करी

लोक शाहूकार बनदे न

अरबें-खरबें च खेलदे न। 

  पर इ’नेंगी घड़ने आह्‌ला 

द’ऊं फुलकें गी तरसदा ऐ। (सफ़ा- 71) 

इʼयां गै मानवी संवेदना ऐ भिक्ख मंगना। पर मजबूरी केह् नीं करांदी। ‘लाल बत्ती’ कविता दियां एह् पंगतियां दिक्खो, जिसलै लाल बत्ती पर गड्डियां रुकदियां न:

हर इक गड्डी कोल

मती थमां मती गड्डियें दे 

शीशे ठ्होरी लैना चांह्दे न

बद्धोबद्ध मंगी लैना चांह्दे न। (सफ़ा- 101)

सुआर्थी सोच, रिश्तेदारी दे भुग्गे पौंदे बंधन, सत्ता आस्तै सियासत, जनभावनाएं कन्नै खेड-खलवाड, पदार्थी लाऽ लेई द्रौड़ बगैरा गै अज्ज दा यथार्थ ऐ। इस यथार्थ परा पड़दा पुट्टने आह~लियां मतियां हारियां कवितां इस संग्रैह् च शामल न। 

मसाल दे तौर पर ‘दुनिया’ कविता च अज्ज दे दस्तूर कन्नै रू-ब-रू होई लैओ:

झूठी रिश्तेदारी

एह्दे झूठे कार-व्यहार 

सच्चा गोते खा दा इत्थै

झूठा होंदा पार

एह् दुनिया ऐ बड़ी बचित्तर 

एह्दा नेईं कोई पार। (सफ़ा- 74)

इस्सै चाल्ली ‘खलार’ कविता च दुनियादारी दा एह् रूप बी दिक्खो:

पीह~न खूब म्हीन 

पींह~दे न लोक

नफ़रतें, बेइमानियें, धोखें ते फरेबें दा

मिक्सियें, मशीनें दा समां ऐ

भलोका दौर

चक्कियें दा थोह्ड़ा ऐ। (सफ़ा-86)

कवित्री डॉ. चंचल भसीन होरें अज्जै दी राजनीती दे यथार्थ दा वर्णन व्यंगात्मक शैली च खून कीता ऐ। सियासत अज्ज सत्ता आस्तै मती सेवा आस्तै घट्ट होंदी ऐ। इस वोट-बटोरू दा फल्ल जनता गी दावें. वादें. लारें ते दलासें दे रूपै च गै मिलदा ऐ। वोट लेइयै सत्ता प्राप्त होई जाने मगरा जनता गी आपसी लड़ाइये लावा होर किश नीं थ्होंदा। 

‘चर्चा’ ते ‘नेता’ कवितां सियासत दा सच्च प्रस्तुत करदियां न। चर्चा दी चर्चा पर नज़र पाओ:

  आखेआ-

‘गरीबी हून मुक्की जानी ऐ।’

मजूरन घाबरी दी बोल्ली-

कैह्‌दे नै?

पैकजें नै ? 

नेईं चाहिदे

किस कारी न? (सफ़ा- 104)

ते हून ‘नेता’ कविता दियां एह् पंगतियां केह् गलादियां न, समझी लैओ:

भाईचारे दी गल्ल एह् करदे 

पर धर्मै पर आपूं लड़ांदे आए

लोकें गी बनाई मत्तु

अपना कम्म चलांदे आए। (सफा-92)

अज्जकल समाज च दबकाऊ ते लुच्चे-लफंगे तत्त्वें दियां जैदातियें दी मार बी सिद्धे-सारे लोकें गी पौंदी ऐ। 

‘मार’ कविता दी इक झलक:

शक्ति-समर्थ

बनी गे हैबान

तुंबै-पिंजै दे न

लहु-लुहान होई दी

सैह्कै दी इन्सानियत। (सफ़ा- 63)

‘उडनखटोला’ संग्रैह् दियां किश कवितां जिʼयां- ‘हौसला’, ‘अजाद’, ‘झत्त’, ‘ओह्’ ते ‘कदें पुच्छी दिक्खो’ बगैरा नारी वर्ग दी वेदना-संवेदना दियां प्रतीक न। इस आस्तै इʼनेंगी नारी विमर्श दियां रचनां गलाया जाई सकदा ऐ। पर इंʼदे च बी कवित्री ने नारी गी अबला नेईं सबला रूप च पेश कीते दा ऐ ते शक्ति सरूपा बनने दा संदेश दित्ता ऐ। 

‘झत्त’ ते ‘ओह्’ कवितां सूर्यकांत त्रिपाठी निराला दी मार्मिक कविता-‘वह तोड़ती पत्थर’ दा चेता करांदियां न।

‘झत्त’ कविता दियां सतरां:

  कम्मै आह्ली दे मुंहै’ पर

  मायूसी, थकावट,

  चैंता-झूरे।

+ + +

  देई जंदी सभनें दे

  चेहरें पर ख़ुशी

  अनसम्भा पेआर,

  फ्ही 

  लेई जंदी

अपने लेई

थकावट, मायूसी,

चैंता ते झूरे।  (सफा- 64) 

इस संग्रैह् दी ‘ओह’ शीर्शक कविता निक्की उमरी च बिपता दा शकार होई दी उस महिला दी क्हानी ऐ, जेह्ड़ी अपने ञ्यानें-गिल्लुएं दी पालमा गितै कुसै लग्गे हत्थ नी अडदी, बल्के अपने हत्थें च गैंती चुक्कियै मेह~नत- मजूरी करदे-करदे अपनी हालत सुधारी लैंदी ऐ। पेश ने ओह्दे संघर्श गी उजागर वरदियाँ किश पंगतियां:

नां कोई रिश्ता बनै सहाई

नां कुसै बत्त सुझाई

निं थ’म्मी कुसै औंगल आई

मेह~नत कीती, गैंती बाही

गिल्लुएं दे मूंह् चूरी पाई

+ + +

पक्कै फर्शै पैर हून तिलकन

पुत्तर नूहां लतां चिक्कन। (सफा- 88)  

डॉ. चंचल भसीन होरें बड़ी पैन्नी नजरी कन्नै समाजी समस्याएं गी दिक्खियै अपनी रचना-धर्मिता नभाई दी ऐ। अज्ज साढ़े समाजै च इक्क होर समस्या लोकें गी खास करी किशोरें ते युवाएं गी घेरा पा करदी ऐ। एह् समस्या ऐ नशीली चीज़ें दे सेवन दी। इस सङणी ने केईं परोआर जुआड़ी दित्ते न। 

कविता ‘दुखेआरी मां’ दियां एह् सतरां समाज गी सोह्गा करने आह~लियां न:

अज्ज रिश्ते-नाते तोड़ी गेआ

रोंदे सभनें गी एह् छोड़ी गेआ

लोकों दनां क रुकी जाएओ

दुखेआरी मां दी सुनी जाएओ। (सफ़ा- 118)

अज्ज भौतकवादी मानसिकता बंधी जाने करी रिश्ते-नातें च दरेड़ां पवा करदियां न। जां फ्ही फंघ सुआकदे चिड़ुएं आंह्गर बच्चे अपने कारोबारी जीवन च इन्ने रूज्झी गेदे न जे घरै च बजुर्गें जां मां-प्यो दी ख़बर सुर्त बी नेईं लैंदे। इसकरी मते लोक कलापें दी समस्या भोगा करदे न।

‘हिखी’ कविता दियां पंगतियां गलांदियां न:

ख़ाल्ली कमरें ते

सुन्न-मसान बेह्ड़ा

खाने गी पौंदा ऐ।

दलकदा ऐ 

ध्रूकदा ऐ………। (सफा-45)

धीऽ-पुत्तर इक्क बरोबर, अस एह् गल्ल ते हर पास्सै सुनने आं पर क्हीकत एह् ऐ जे कुड़ियें गी घरें च जागतें दे मुक़ाबले च अजें बी बरोबरी नेईं मिलदी। इस पास्सै बी कवित्री ने अपने संग्रैह् दी कविता ‘कदें पुच्छी दिक्खो’ समाज दा ध्यान खिच्चने दी कोशश कीती दी ऐ। ते 

इ’यां गै ‘बुनतर’ कविता च घुरें गी प्रतीक बनाइयै रिश्तें-नातें च घटती गरमैश गी परती जगाने दा स्नेहा दित्ते दा ऐ:

डिग्गे दे घुरें गी

कदें। 

दर~हेड़नी आं 

कदें फ्ही बुननी आं

उ'नें सलाइयें कन्नै  

जेह्डियां सचज्जल हियां कदें। (सफ़ा- 52)

जित्थै ‘ग’लियां’ कविता विकासवाद दे नांऽ पर पुरानी पन्छान गुआने दा दर्द ब्यान करदी ऐ, उत्थै गै ‘दुआसी’, ‘चेते’ बगैरा कवितां मानसिक भावें गी अभिव्यंजत करदियां न। 

कविता-संग्रैह दियां कवितां-‘पानी’, ‘जम्मू-कश्मीर’ ते ‘दिक्खी लैओ’ आदि बी बड़ियां सुंदर रचनां न ते सकारात्मक संदेश दिंदियां न। जि’यां:

बेशक सौ तुसें हीले कीते

हिरख-आरती बी सजाई दिक्खी लैओ। (सफा-119) 

डॉ. चंचल भसीन हुंदा कविता-संग्रैह् ‘उडनखटोला’ इक ऐसी काव्य कृति ऐ जिस दे बारे च एह् गलाना सार्थक लगदा ऐ जे जिन्नी डूंह्गी चलोब्भी लाओ, उन्ने गै मोती कड्डी लैओ। इ’नें रचनाएं गी जि’न्ने बारी पढ़ो, उन्नियां मतियां बरीकियां नजरी औङन। सब्भै कवितां सुच्चे मोती न। 

कुसै कृति गी सफल कृति तां गै आखेआ जाई सकदा ऐ जेकर ओह् पाठकें गी पसिंद आवै। ते कृति गी उत्तम तां गै मन्नेआ जाई सकदा जिसलै ओह् पाठकें दी रूह् तगर पुज्जा जाऽ। इस ल्हाज कन्नै में इक पाठक दे रूप च ‘उडनखटोला’ गी इक उत्तम कृति गै आखङ की जे मिगी इस्सी पढ़ने च अनंद दी अनुभूति होई।

सारियें कवितें च पुख्तगी ऐ, भाशा च लय, प्रवाह, सरलता, सैह्जता ते मानिकता ऐ। काव्य-संग्रैह् समाजी सरोकारें गी पूरी चाल्ली नभांदा ऐ। एह् सब्भ रचनाकार दी तजर्बेकारी, कोमल कल्पना, भाशाई ज्ञान ते सूखम नज़रिये दा नतीजा ऐ।

खीर च इक पाठक, पूर्व अध्यापक ते आकाशवाणी दे पूर्व प्रड्यूसर दी द्रिश्टी कन्नै एह् गलाना चाह्ङ जे इस संग्रैह दियां कवितां जेकर स्कूलें, कालेजें च डोगरी पाठ्यक्रमें दा हिस्सा बनाइयां जान तां इक चंगी गैं होग। एह् मेरा निजी मत ऐ।

एह्दे कन्नै गै में डोगरी प्रेमियें गी इक स्तरी साहित्यक कविता-संग्रैह् देने लेई कवित्री ते लेखिका डॉ. चंचल भसीन होरें गी मबारखवाद दिंदे होई एह् कामना करङ जे ओह् तौले गै इ’यै जनेही होर कृति पाठकें गी देङन ते डोगरी साहित्य दे खजाने गी समिृद्ध करङ।

                        —————————————————————————————